DIRÆ IN
ANGLIAM.

IX. Februarij M. DC. XLIX.

 

Phœbe Thyestæas refugo si lumine mensas,
Factaque Cadmææ puduit te cernere gentis,
Cur indigna tuos fœdant spectacula vultus,
Siderei Rex alme chori, dum Regia cernis
Subdita carnificis funestæ colla securi,
Rex fatum Regis nusquam miseratus iniquum ?
Iam tibi septeno signantur tempora cursu
Ex quo magnanimus, scelerataque exul ab vrbe
CAROLVS, aduersam passus licet vndique sortem,
Bisque domo profugus, rupto bis fœdere captus,
Sustinet extremas inuicto corde ruinas ;
Nec tanta infestos iniuria mitigat hostes.
Principis hi solo satiari sanguine gaudent :
Neve quid intactum sceleri fera turba relinquat
Iuridicum reprobos munus quæsiuit in vsus,
Astræamque simul voluit fecisse nocentem,
Legitimum patrare nefas sic impia credens.
Non aliter diuina malis immiscet, & omne
Religione sacrum Stygijs Magus artibus aptat.

 

 

At vos monstra fori, rabies quêis militis ausa est
In Domini dare iura caput, quêis lege scelestum

-- 4 --

Iudicium firmare placet, rituque Deorum
Insontem, iurisque sui producere Regem :
Tartarei quæ pœna queat, quod grande barathri
Supplicium infligi vestris non lenius ausis ?
Non si omnis pœnæ species concurrat in vnum,
In vestrum ruitura caput : sed nulla doloris
Vltio digna mei satis est, nisi funditus ipsa
INSVLA, monstra dedit nostro quæ talia sæclo
Subter aquas tota pereat cum gente, nec ausit
Oceano proferre caput, penetransque per imas
Æquoris atque soli partes, inamabile centrum
Occupet, & sese cruciandam ad Tartara sistat ;
Indignam se luce frui nam crimine prodit
Sacrilego, & Stygia meritam caligine mergi :
Quique suum solem voluere extinguere, fas est
Credere perpetua damnatos nocte Britannos.

 

 

INSVLA dæmonibus quondam famosa colonis,
Quorum forma dedit caudatæ nomina Genti.
INSVLA sueta manus Regum infestare cruore,
Quam fore ciuili respersam sanguine, Vates
Præcinit, à Satanæ Merlinus sanguine cretus.
INSVLA vicino truculentior æquore, summi
Quam pia cura DEI toto diuisit ab Orbe
Ne qua foret tactu tellus polluta nefando.

 

 

Fœlix qui primos vindictæ carpet honores
Parque nouo sceleri tormentum aptare valebit
Digna tibi indigno pro crimine damna rependens.

 

PH. S. P.

S. I. S. C. R.