ACTION DE GRACE A NOSSEIGNEVRS
de Parlement, par les Habitans de la Ville &
Faux-bourgs de Paris, pour l’acquittement
& la descharge des loüages des Maisons,
du quartier de Pasques, par
vn Arrest solemnel.

CE n’est pas sans raison que les Philosophes
disent que la Prudence sert de regle & de
mesure aux autres vertus, veu que sans elle ces
belles habitudes seroient sans lustre, sans éclat, &
sans consistance. C’est elle qui sert de flambeau à
l’entendement, qui luy fait voir & cognoistre clairement
les choses que l’on doit mettre en execution,
cette rare vertu semble estre essentielle à
ces grands hommes que Dieu a logé dans le Parment,
pour le soulagement du peuple & la gloire
de la France. L’experience nous a fait voir ces
mois derniers que leur prudence est égale au zele
qu’ils ont de seruir leur patrie ; que la Grece ne
nous vente plus ses sages, puis qu’ils n’estoient
que la figure des nostres, que Rome ne se glorifie
plus de ses Patricides & Senateurs, la sage conduite
des nostres & la grandeur de leur merite,
nous apprennent que si par vne Palyngenese ces
anciens Romains pouuoient ressusciter, ou plustost

-- 4 --

renaistre, ils ne seroient que leurs disciples, vous
treuuerez que mon dire est tres-veritable, si vous
considerez auec moy leurs soins, leurs trauaux, &
les moyens dont ils se sont seruis pour nous mettre
en repos & en tranquillité, lors que la discorde
obligea le peuple de Paris à s’exercer au mestier
des armes, à l’instant l’abondance des viures s’esuanoüit,
& le Commerce fut interrompu, nos
tres-illustres Senateurs en ceste conjoncture ont
si bien marie leur prudence auec leur authorité,
qu’ils ont fait cognoistre euidemment qu’ils sont
plustost nez pour seruir leur patrie, que non pas
pour eux-mesmes, ayant maintenu malgré la
disgrace de la fortune & de la rage d’vne guerre
ciuile, ceste ville dans vn bon ordre, treuué le
moyen de rompre les obstacles qui empeschoient
l’arriuée des prouisions ordinaires, & enfin ayant
remis Paris dans l’estat de sa premiere tranquillité.
O tres-illustre & tres-puissante ville, ce Nauire que
tu as pris pour tes armes, ne voguera desormais
que dans vne mer calme & tranquille, les tempestes
& les orages n’oseront plus gronder, ces
funestes Metheores ont du respect pour tes sacrés
Pilotes, qui sont des dieux en terre, ton Nauire
sans crainte d’aucun escueil ny d’aucun banc flotera
desormais dans vn Ocean de bon-heur, tes
habitans noyeront le souuenir de leurs calamitez
passées dans le torrent des douceurs & des plaisirs

-- 5 --

qu’ils experimenteront, & si le dire du Poëte
est veritable, Dulcia non meruit qui non gustauit
amara, il seront bien aise d’auoir auallé de l’absynthe
& de l’amertume, afin de meriter de boire
à long-traits, & se rassasier des delices, qui ne
doiuent auoir point d’autres fins que les bornes
du temps.

 

O que ce Sage auoit bonne grace de dire que
les desplaisirs, & les afflictions sont le commencement
de la ioye, & de la felicité : Et ne plus ne
moins qu’aprés la pluye paroist vn temps serain, &
apres l’Hyuer suit le Printemps, de mesme apres
la Guerre necessairement suit la Paix : Il adiouste
encore qu’il en est de mesme des afflictions, &
des emotions dans les grandes Republiques ; comme
des vents aux grands arbres qui ne seruent
qu’à leurs faire prendre des plus profondes racines
en terre. Sça courage la Colombe a paru portant
vn rameau d’Oliues dans son bec, les Alcions paroissent
de toute part sur le bord de la Seine : Ce
grand Nauire de Paris n’a rien plus à craindre l’ancre
est ietté ; nous ne deuons maintenant esperer
que de voir à la Proüe de ce grand Vesseau, Castor
& Pollux, qui nous promettent vn temps fauorable
à nos iustes desseins : quelles Eloges, &
quelles loüanges ne deuons nous pas donner à
nos Anges tutelaires du Parlement, qui apres
nous auoir remis dans vne tranquillité, afin de

-- 6 --

subuenir à nos presentes necessitez, ont deschargé
tous les Marchands, Artisans, Hosteliers, Locataires,
Soubs-locataires, qui tiennent Boutiques,
Eschoppes, & Maisons, ou parties d’icelles en ceste
ville & faux-bourgs de Paris : C’est à sçauoir
du cartier escheu au terme de Pasque dernier,
par vn Arrest solemnel. Il faut bien croire que
ces grands enateurs meritent que la renommée
publie leurs loüanges dans les quatre coings de
l’Vniuers, que les champs d’Idumée ne produisent
des Palmes que pour leurs Triomphes : Et
que chaque habitant de Paris doit grauer dans son
cœur leurs illustres Portraits : Que l’antiquité ne
nous vente plus son Cratere, son Vlysse, & son
Ephestion la sagesse de ces hommes tant fût elle
grande, en comparaison de celle de nos Legislateurs,
ne semble qu’vne pure resuerie ; Et bien
que ces Anciens personnages meritent que la memoire
conserue éternellement leur nom, à cause
des grands seruices qu’ils ont rendus à leur patrie,
leur gloire ne laisse pas de s’obscurcir, & diminuër
grandement par la grandeur du merite, & des illustres
actions des Peres du peuple Parisien, que
si les Grecs autres fois ont estably des ieux à l’honneur
des Grands hommes, qui auoyent employé
fort vtilement leur trauail, & leur industrie pour
le bien public, ou bien ils auoyent exposé leur vie
pour le seruice de leur patrie, quels jeux, quelles

-- 7 --

dances, quels balets ne doiuent point inuenter
les Parisiens à dessein de donner des preuues &
des tesmoignages, des obligations qu’ils ont aux
Dieux de nostre illustre Parlemẽt, & pour honorer
leur merite dõt l’excez me porte plutost de les admirer,
que d’en parler. Il faudroit l’esloquence d’vn
Ciceron, & celle d’vn Demostene pour en bien
discourir, & pour frequanter dignement leurs
loüanges, il faudroit auoir la voix d’Amphion &
d’Orphée, ou plutost il feroit besoin de l’harmonie
des Anges : en vn mot ces grands Senateurs
sont Viri super titulos, d’où vient que tous les
honneurs, & attributs qu’on leur peut donner sont
au dessous de leur merite ; Paris a dessein de recognoistre
leurs signalez benefices, deuroit à l’exemple
& à l’imitation des Romains former & dresser
vn Capitole, afin d’y conduire en triomphe les tres
illustres Conseillers du Parlement, ils ont cent
sois plus merité la Corone de gloire & d’immortalité
que les Scipions, ny les Catons, ilion thebes
& niniue seroient sur pieds si dans leurs enclos
se fussent trouuez de semblables Oracles, quelles
actions de graces leurs doiuent rendre les habitants
de ceste tres-florissante Ville, non seulement
ils leurs sont redeuables de leur bon-heur, de leur
repos ; mais encore de l’accroissement de leurs richesses,
la guerre a redouté leurs Arrests, & la
fortune suit les ordres de sa volonté, combien

-- 8 --

de pauures Marchands seroient contraints de vendre
à vil prix leurs marchandises à dessein de payer
leurs loüages, sans leur grace specialle, combien
des Artisans auroient vendus leurs meubles pour
le mesme sujet : Et combien de pauures femmes
veufues & des enfans orphelins auroient importuné
leurs amis, ou demande l’aumosne, pour
auoir dequoy contenter leurs hostes, ces personnes
seroient les plus ingrates de la terre, si elles
n’addressoient tous les iours leurs prieres à Dieu
pour leurs prosperites, si elles n’employent durant
le cours de leur vie, leurs langues à leur donner des
benedictions, & si elles n’imitent mesme les oyseaux
à chanter leurs loüanges dans les quatre
coings de l’Vniuers, il est aussi raisonnable que
tout ce qu’il y a d’honnestes gens en cette ville,
leur rende les honneurs & les homages qu’ils meritent,
le Ciel qui à leur consideration a espousé
nos interests, sans doute seroit irrité contre nous, si
nous ne leurs tesmoignions point par des grandes
reconnoissances, & par des tres-humbles remerciements,
le desir que nous auons de viure sous
leur protection, & de mourir pour leur seruice.

 

FIN.