SI iamais la valeur à paru auec esclat
& auec de signalez tesmoignages,
comme autre-fois celle
des Hectors & des Achilles : Certes,
nous deuons bien à present vanter la
grandeur & la generosité de ce Prince, dont
la valeur est tellement connuë, que l’on
peut auoüer auec verité qu’il ne s’est iamais
veu de Heros plus digne de porter le nom
& le tiltre de vainqueur que ce grand Duc.
Et comme il n’y a point d’éloge qui ne soit
au dessous de ses merites, Quelles palmes &
quels lauriers seront assez florissans pour
couronner sa teste, luy qui va garantir la nostre,

& la mettre à l’abry de l’enuie & de la
rage de nos ennemis ? Quel marbre ou quel
[1mot ill.]sera assez fidel pour conseruer sa memoire
à la posterité, luy que nos successeurs
doiuent reuerer comme le conseruateur de
leurs biens & de leurs fortunes ? N’auoüerez-vous
pas auec moy, (iudicieux François)
que vos cœurs sont remplis de rauissement
quand il s’agit de son seruice, & lors que la
fatale nouuelle vint icy qu’il estoit entouré
d’ennemis, ne le fistes-vous pas paroistre
en ce rencontre, & ne courustes vous pas
plus vistes que les esclairs luy tesmoigner
vos vœux & vos ardeurs : mais la vertu qui
l’accompagne n’auoit garde de l’abandonner
à ces monstres d’iniquité, puis que la cause
pour laquelle il combattoit estoit trop
pleine de Iustice : & ce souuerain Maistre
des decrets qui nous l’a donné pour nous
proteger contre la tyrannie, l’accompagnera
tousiours, &; le fera triompher des ennemis
de nostre Roy & de son Estat ; C’est par
luy que nous pouuons esperer la tranquilité
& le repos, aussi nous l’a-t’il desia monstré
par ses actions heroïques : les viures &

les conuoys qu’il fait entrer iournellement
en cette ville, en sont des preuues éuidentes ;
n’a-t’il pas aux champs de Mars affronté
les plus grands perils que puisse franchir
vn valeureux soldat ? & ceux qui ont esté gagez
pour commettre vn homicide en sa personne,
n’ont-ils pas esté punis par sa propre
main de leurs laschetez. De descrire toutes
les victoires où il a signalé son courage, l’on
descriroit auec plus de facilité le triomphe
d’Alcide, & si vous rappellez la prise d’Arras,
vous le pourrez voir encore tout couuert
du sang des ennemis, qui pensoient asseurer
leur vie, & rencontrer leur salut dans
la fuitte, enfin l’on monstreroit plustost l’Iliade
comprise en vne noix que toutes les
belles & genereuses actions de ce Prince.
Apres tãt de manifestes marques de son courage,
il faut donc necessairement conclurre,
puis que sa valeur est immortelle, qu’il
luy faut par consequent des palmes immortelles,
& que nos vers & nos escrits ne sont
pas assez puissans, pour vanter sa valeur,
que nostre bouche n’a pas assez d’éloquence
pour publier son merite, & qu’il n’y a

point d’assez durables métaux pour immortaliser
sa gloire.