Anonyme [1649 [?]], LE DECALOGVE ROMAIN. , françaisRéférence RIM : M0_868. Cote locale : C_2_45.
LE DECALOGVE ROMAIN Enuoyé par Innocent X. à tous les Princes Chrestiens, & à leur Noblesse, en faueur de leurs peuples.
LE funeste estat où l’Europe Tomberoit sans mon prompt secours M’oblige d’auoir mon recours A vostre espée qu’vn Ciclope A forgé pour me maintenir Durant tout le temps aduenir, Grands Princes & chaire Noblesse Receuez mes Commandemens Que pour vos peuple ie vous dresse Et pour leur seul soulagement.
I. COMMANDEMENT. Au Roy de France.
Cher fils aisné de mon Eglise Roy tres-Chrestien mon fauorys Planté vostre Cour dans Paris, Et redonnez luy la franchise, Deliurez vos peuples soubsmis De la main de leurs ennemis, Rendez plus petites vos tailles, Les subsides & les imposts, Vos peuples qui sont mes oüailles Meritent de viure en repos.
II. COMMANDEMENT. A l’Empereur.
Si par mes vœux & mes prieres Vous n’auez plus grand Empereur Chez vous la guerre & sa fureur Qui sont au bord de vos frontieres, Taschez maintenant par vos soins De pacifier mes deux oings Les grands Rois de France & d’Espagne Faites les viures en bonne paix : Car leurs peuples de la campagne Ne peuuent souffrir desormais.
III. COMMANDEMENT. Au Roy d’Espagne.
Grand Roy qui voyez que la guerre Ne vous porte pas grand profit Il me semble qu’il vous suffit D’auoir encore plus de terre Que n’en a pas le grand Seigneur, De grace faites moy l’honneur De viure en vnion extréme Auecque vostre grand Neueu Le Roy de France qui vous aime, Et secondera mon vœu.
IV. COMMANDEMENT. A la Reine d’Angleterre.
Princesse que le Ciel honore Et que la terre doit cherir L’vnique moyen de guerir Du déplaisir qui vous deuore Est de mettre à bas ces mutins Ces parricides intestins Ces monstres de vostre Angleterre Vos desirs seront accomplis Si vous faites finir la guerre Entre le lyon & le lys.
V. COMMANDEMENT. A la Reine de Pologne.
Ie suis estonné grande Reine Que vous ayez dans vostre cœur Contre la France du rancœur Et contre vostre sang de la haine Vous auez enuoyé des soldats Afin de faire du degasts Au tour de Paris les delices Iadis de vostre Maiesté, La France vous a fait seruices Ayez pour elle de la bonté.
VI. COMMANDEMENT. A la Reine de Suede.
Ie suis contant quand la colombe A pacifié vos guerriers Et que l’Empire à ses lauriers Sans crainte que la foudre y tombe Comme vne autre semiramis Vous deuez aider vos amis A dresser vne iuste guerre Contre Farfax & les Anglois, Le trespas du Roy d’Angleterre Fait que ie vous prescrits ces lois.
VII. COMMANDEMENT. Aux Rois de Hongrie, de Boheme, de
Cessez de viure en la discorde Bannissez la rebellion, Viuez en la bonne vnion Afin que le bonheur aborde Vos Royaumes & vos Estats, Si vous mettez le glaiue abas Vous viurez exempts des allarmes, Que si vous en armés vos mains Vous deuez retourner vos armes Contre les Anglois inhumains.
VIII. COMMANDEMENT. A l’Archiduc de Florence.
Tres-Auguste & tres-puissant Prince Sous qui mesme ie me sousmets Auec de tres-humbles respects Qui font voir mon zele moins mince, Faites que par vos grands credits Dans l’Europe mes saints Edicts Soient receus auec reuerence Que les Princes vos aliez Pour monstrer leur obeïssance Se rendent plus humiliez.
IX. COMMANDEMENT. Aux Ducs de Lorraine, & de Sauoye.
Grand Prince le Mars de la guerre Cessez d’auoir plus de rigueur, La France ayme vostre vigueur Et vous veut rendre vostre terre : Et vous seul Prince des Lombards Qui tenez sous vos estendarts Le bonheur auec la victoire, Fauorisez mes grands projets Vous deux en aurez de la gloire, Et ie beniray vos projets.
X. COMMANDEMENT. A la Noblesse de l’Europe.
Grands Heros que le Ciel honore Et donc le sang est plus qu’humain N’attendez plus au lendemain De restablir la Paix encore, Ie veux que par vostre valeur Vous fesiez finir le malheur Qui poursuit l’Eglise Romaine, Afin que vostre bras puissant Par vostre force souueraine Rende sous les pieds le Croissant.
FIN. |
SubSect précédent(e)
|
Anonyme [1649 [?]], LE DECALOGVE ROMAIN. , françaisRéférence RIM : M0_868. Cote locale : C_2_45.