Anonyme [1651], LE DVC DE BEAVFORT aux bons Bourgeois de Paris. Cinquiéme affiche le 30. Iuillet, 1651. , françaisRéférence RIM : M0_1175. Cote locale : B_9_18.
SubSect précédent(e)

LE DVC DE BEAVFORT,
aux bons Bourgeois de
Paris.

MESSIEVRS,

Puisque ie suis si malheur
eux, que la maladie qui me
tient dans le lict depuis si longtemps,
m’empeche de pouuoir
rendre du seruice au public, dans
la plus belle occasion qui se soit iamais
presentée, pour terminer les
maux que le Card. Maz. & ses pensionnaires
vous font souffrir depuis
tant d’années, & que M. le
Prince animé par le zele qu’il a
pour le bien de l’Estat, & le soulagement
du peuple, nous a fait naistre
en resolution de la faire reüssir

-- 4 --

à vostre aduantage, comme il
m’asseure tous les iours & encore
hyer ; pourueu que la recognoissance
que vous deuez auoir des
bons seruices qu’il vous rend, luy
puisse faire trouuer asseurance de
sa personne dans Paris, entre les
mains des Bourgeois, pour le repos
desquels il s’expose à la hayne
des Partisans du Card. Maz. nostre
ennemy, qui taschent encores
plus que iamais de perdre ce grand
Prince, parce qu’il vous procure
du bien par leur esloignement.
Vous ne deuez point douter que
s’il ne cherchoit que la seureté de
sa personne seulement, il n’auroit
qu’à se retirer en son Gouuernemẽt,
où il n’auroit rien à craindre ;
mais par la bonté que ce Prince a
de preferer le bien public au sien
propre, pour vous faire cognoistre
l’amitié qu’il a pour vous, qui

-- 5 --

auez demandé sa liberté, il reste dans
cette Ville pour continuer ses seruices
aux Parisiens. C’est vne action si
digne d’vn tel Prince (sans le secours
duquel nos souffrances sont sans remede)
si necessaire pour la conseruation
de l’Estat, & si vtile pour vostre
propre repos, que i’espere encores
qu’ayant conserué quelque memoire
des seruices que i’ay eu l’honneur
de vous rendre, & pour lesquels vous
m’auez tesmoigné tant d’amitié ; la
priere que ie vous faits de ne point
abandonner les interests de Monsieur
le Prince (qui sont les miens &
les vostres) ne sera pas sans effect,
puisque de sa conseruation despend la
mienne & la vostre propre, n’ayant
tous deux qu’vn mesme but, d’empescher
que ces harpies n’acheuent
de deschirer l’Estat, & de ruyner les
subjets du Roy par le restablissement
de la tyrannie de leur maistre ; le retour

-- 6 --

duquel ne peut estre supportable
aux gens de bien, puisque la penseé
méme leur en doit estre horrible.

 

S’il vous reste donc quelque peu
d’affection pour moy, secondez les
bonnes intentions de Monsieur le
Prince, attendant que ma santé me
permette de me rendre aux assemblées
qui se font, pour y seruir le public ;
c’est ce que ie vous demande
auec toute la passion imaginable, c’est
vne grace que vous ne deuez pas me
refuser ; puis qu’il est tres-certain que
si l’on souffre les creatures du Cardinal,
ils ne manqueront pas de descrier
ma conduite & celle de Monsieur
le Prince auprés du Roy & de la
Reyne, afin que s’ils ne peuuent restablir
leur maistre par les cabales
qu’ils font tous les iours, ils puissent
procurer son retour par la hayne
qu’ils conseilleront à leurs Majestez
d’auoir contre nous, ce qui

-- 7 --

causeroit dans la Majorité nostre
perte & la vostre Ma maladie vous
doit assez faire voir l’attentat qu’ils
auoient fait sur ma personne, & dont
ie n’ay encores osé me plaindre craignant
pis : celuy que l’on vouloit faire
sur celle de Monsieur le Prince, vous
fait aussi cognoistre le dessein qu’ils
auoient fait de le perdre, comme le
seul obstacle à leur tyrannie : Enfin
tous les deux ensemble vous monstrent
clairement qu’on n’en vouloit
à nous deux, que pour se venger
apres des Parisiens qui ont
chassé leur maistre, & pour mieux y
reüssir nous perdre, parce qu’il n’y a
que nous deux qui nous opposions
à leurs mauuais desseins, sous la faueur
de son Altesse Royalle, les assistances
de laquelle ie vous supplie
d’implorer dans ce rencontre.

 

-- 8 --

SubSect précédent(e)


Anonyme [1651], LE DVC DE BEAVFORT aux bons Bourgeois de Paris. Cinquiéme affiche le 30. Iuillet, 1651. , françaisRéférence RIM : M0_1175. Cote locale : B_9_18.