AV LECTEVR.

LE François est si amoureux de ce qu’il aime, qu’il
a mesme du respect pour ses deffauts, & pour ses
foiblesses, quand il rencontre quelqu’vn qui les éleue, ou
qui les approuue : & comme il ne veut point estre contredit,
il ne cherche & n’estime que ceux qui les flattent : &
ne manque jamais d’en trouuer de cette nature, qui l’endorment,
& qui le perdent, comme les Psylles de qui les
loüanges estoient si funestes, que c’estoit par elles qu’ils
auoient accoûtumé d’empoisonner & desseicher jusques
aux trouppeaux. Quoy que ie sois de la nation à qui ie
parle, l’estat ou j’ay esté àppellè par vne inspiration particuliere,
ne me permet pas de flatter ny de mentir : C’est pourquoy
ie diray mon sentiment auec sincerité & sans
feintise, afin que les Peuples en puissent tirer du profit &
du contentement : & que ceux qui sont abuséz dans vne
fausse esperance, aprés auoir bien consideré les raisons de
l’vn & de l’autre party, & entierement examiné ce discours,
recognoissent la vraye source de leurs mal-heurs,
pour y remedier plus facilement, & auec plus de promptitude.

-- 3 --