ON iuge de la foiblesse ou de la beauté des esprits selon les choses
où ils s’amusent ; mais quel iugement feray-ie de ceux de ce
temps ? Car la plus-part admirent leur promptitude, leur industrie,
leur inuention, & beaucoup d’autres particularitez ; leur consentitay-ie
donc ? & l’impetuosité de ce torrent, rompera-il les digues de la raison
qui s’oppose au contraire, il ne le semble pas, car qui pourroit auoir
l’entendement r’assis & loüer comme vne chose parfaite, ce qui est impur,
plein de vent & de corruption ? Me banderay-ie aussi contre l’vnanime
consentement ? c’est trop de temerité, & m’asseure que quelqu’vn
me dira que ces paroles là meriteroient vn Royaume pour leur
donner authorité : mais tous ces nuages n’empescheront point que ce
petit esclair ne donne iusqu’à vous, & comme en vn grand orage, le
tonnerre se faict en quelques lieux pour faire seulement dissoudre les
humiditez amassées à l’oposite, & en d’autres pour y faire tomber le foudre,
auec beaucoup de degast où il s’eslance ? Aussi ce discours sera
pour vous esclaircir du doute que vous pourriez auoir en cecy, & pour
terrasser ce bel edifice, qui n’a que le fable pour fondement. Et afin de
vous faire comprendre cecy plus facilement, ie pense qu’il vaudra
mieux vous desduire succintement la nature de l’esprit humain.

L’ame de l’homme est vne enthelechie, ou vne substance diuine
raisonnable, immortelle, qui sçait & iuge des choses par l’intelligence,
& qui par la conscience, fait & tend aux choses necessaires
pour sa fin.