Si ie voulois maintenant finir ce discours, ma conclusion se feroit en
cet a gument, que s’il n’y a point de discipline militaire, ny de police
parmy nous, les deux premiers n’ont pas besoin de beaucoup de ceruelle
pour paruenir à leur grandeur : & quant aux troisiesmes, ie croiray
qu’ils en ont si l’on m’accorde que la glus en a aussi ; Car que font-ils
autre chose que de prendre ce qui se iette dans leurs viscuositez ? (&
Dieu nous garde de ces sangsuës qui succent plustost le bon que le mauuais
sang) Mais non, ie veux m’estendre d’auantage, & deuant que
de prononcer l’Arrest ie veux vous faire lire leurs defenses.

Faisons donc venir sur ce Theatre vn des Suffragans de la premiere
bande, qui auec vne grosse perruque frisee, cordelée, saupoudrée, les
sourcils pincetez, les iouës plastrees & vermeillonnées, la moustache
redressée, la teste branlante, la gorge ouuerte, la bouche pleine de blasphemes,
& tout le corps en vn mouuement perpetuel, me vienne aborder
auec vne main sur l’espée, l’autre à son costé, & me dire : Par la
M..... Monsieur le Philosophe vous estes volontiers quelque homme
bien entendu au fait de la guerre pour nous en discourir : mais dites
moy nouueau Censeur ne serez vous point vn de ces iours la monstre
pour me demander mon seruiui ? Par la M..... ie croy qu’il vous feroit
bon voir en vn camp, mais ce seroit au coing d’vne tente la teste dans
vne main & les yeux sur la 70. epistre de Seneque, meditant vostre derniere
heure. Toutesfois afin que vous ne puissiez dire que ie vous aye
payé de Rodomontades, ie veux pour ceste fois faire tant d’honneur à
vos resueries, que de m’arraisonner auec elles.