Anonyme [1649], LE MOVCHOIR pour essuyer les yeux DE MONSIEVR LE PRINCE DE CONDÉ. , françaisRéférence RIM : M0_2511. Cote locale : C_4_60.
LE MOVCHOIR pour essuyer les yeux DE MONSIEVR LE PRINCE DE CONDÉ. A PARIS, M. DC. XLIX.
LE MOVCHOIR POVR essuyer les yeux de Monsieur le Prince de Condé.
DE Condé essuyons nos pleurs, Il nous reste assez de malheurs Pour espuiser toutes nos larmes ; Il est mort ce grand Chastillon, Mais quoy ! faut-il rendre les armes Pour voir mourir son compagnon.
C’est à la prise de Charenton Qu’est mort ce braue Champion, Mais il n’a rien fait que pour luy ; Ce qu’il a fait, nous le faut faire, Et peut-estre dés auiourd’huy Ce sera nostre heure derniere.
Faut-il que deuant vn village Soit mort le plus grand personnage, Nous y auons beaucoup perdu ; Il a fallu y satisfaire Puis que Dieu l’a ainsi voulu Afin d’augmenter nos miseres.
Ce qu’il a fait, nous le ferons Comme luy, vous & moy mourons : Il n’est point de personne au monde Exempte des loix du trespas, Tout doit perir, Stix est vn onde Qu’on ne sçauroit ne passer pas.
Tout flechisoit de sous ses loix, Les Peuples, les Princes, les Roys, Tous les Potentats de la terre, Ducs, Marquis, Comtes & Barons, Trembloient de peur de luy déplaire, Mais il est mort, & nous mourons.
I’estime beaucoup mieux le sort D’vn chien viuant que d’vn Roy mort, Pour ce qui regarde la terre : Chastillon doit estre pourry, Ces os sont reduits en poussiere, Et comme luy, tout doit perir.
Il n’est pas moins mort que Cinq-Marcs, Que Marillac, & des Essarts, Que le Cardinal de Berulle, Que sainct Preüil & Montmorency, Que Thou & l’euesque de Iulle, Ils sont morts, il est mort aussi.
A quoy se faire ainsi garder ? A quoy bon de ne regarder Les gens qu’à trauers vne vistre ? On à beau se vouloir cacher, La mort s’attache à vne Mistre Comme à la coëffe d’vn vacher.
Elle regne dans les Palais, Les Sceptres, comme les ballais Sont des sujets de son Empire ; Les bestes, les hommes, les Roys, Et rien de tout ce qui respire N’est exempt de ses dures loix.
Elle foüille de toutes parts, Elle saute dans les remparts, Elle moissonne à la campagne, Elle prend le ieune & le vieux, L’vn chez soy, l’autre en Allemagne Enfin, elle regne en tous lieux.
Pour executer ses desseins, Elle se sert de toutes mains, Tous les combats sont ses ministres, La guerre, la peste & la faim Et tous ses accidens sinistres Qui font perir le genre humain.
Ce n’est la peste ny la faim, Mais par vn mauuais coup de main Qui a mis à bas ce grand Homme Qui entreprenoit le party De Iulle Mazarin de Rome, Contre le Prince de Conty.
L’vn meurt en prenant son repas, L’autre rencontre le trespas Au millieu des pompes d’vn Louure, Et tel croit estre dans vn lict, Qui en s’éueillant se decouure Damné pour quelque grand delict.
Enfin ce qui vit doit mourir, Tout doit passer, tout doit perir, Dieu seul doit estre perdurable ; Cher de Condé prend garde à toy, Esuite le sort miserable Qu’on prepare à toy & à moy.
FIN.
|
Section précédent(e)
|
Anonyme [1649], LE MOVCHOIR pour essuyer les yeux DE MONSIEVR LE PRINCE DE CONDÉ. , françaisRéférence RIM : M0_2511. Cote locale : C_4_60.