LE REPENTIR DE MAZARIN,
par luy tesmoigné à la Reyne, & la demande
de son congé.
MADAME,
Si ie n’eusse iamais cessé de croire à nul autre, qu’à vostre
cœur ; AVGVSTE REINE, sur la grandeur de l’amour
que vous auez pour le repos du peuple, & le bien de la
France, autãt que pour la gloire du plus Auguste Monarque
de l’Vniuers vostre Fils ; ie n’eusse esprouué dans le plus
haut estat de ma fortune, les ressentimens extraordinaires
de la crainte & de la douleur ; mon ame ne se verroit sur le
bord du precipice, si ie n’eusse esté par trop credule aux solicitations
feintes, & supposées, par la passion de ceux qui
pensent rendre leur mal-heur moins sensible, m’y entrainant
auec eux.
I’apprends par mon interest propre, que le Ciel ne nous
dite ses loix, que par la bouche des Souuerains ; & ne prononce
ses oracles, que par l’organe des Rois ; & que l’esclat
de ma gloire n’a commencé à perdre son lustre, que lors
que i’ay voulu esteindres les diuines flammes de vostre
amour enuers vos sujets : Il est vray, que l’intemperance de
mes desirs, & de mon auarice, a estouffe tous les rayons de
ma dignite & de mes grandeurs ; & suis contraint par les tesmoignages
de mes yeux mesme, & par les effects d’vne experience
des desordres que i’ay causé dans l’Estat, de m’en
aller ; ie suis deuenu l’obiect de l’ignominie, & de l’opprobre
de ceux, de qui ie pouuois attendre l’honneur, & le lustre
Anonyme [1649],
LE REPENTIR DE MAZARIN PAR LVI TESMOIGNE A LA REYNE, ET LA DEMANDE DE SON CONGÉ , français
Référence RIM : M0_3352. Cote locale : A_8_41.