Puis vous laira sans dire mot
Et Iules passera pour sot.
Parlons clair pour nous faire entendre,
Quelle foy pouuez vous attendre
D’vn Prince qui sçait en vn mois
Tourner casaque au moins dix fois ?
N’est-ce pas son grand stratageme ?
N’a-til pas souuent fait de mesme
(Sans craindre ny diable ny Dieu)
Au Cardinal de Richelieu,
Dont l’esprit extraordinaire
Faisoit tout ce qui se peut faire ?
Et le Cardinal Mazarin
Penseroit-il estre plus fin ?
Il s’en faut plus de quinze & bisque.
On dit bien que Nancy court risque
D’estre remis à son bon Duc :
Mais ce n’est pas selon S. Luc,
Ny selon autre Euangeliste,
Ce n’est pas mesme dans la liste
Des Predictions de ce temps
Dont Questier rend les fous contens.
Mazarin peut bien luy promettre
Par serment, de le luy remettre :
Mais promettre & tenir sont deux
Car c’est vn coup trop hazardeux.
Et d’ailleurs on sçait qui s’oppose
A cette offre qu’il luy propose.

Page précédent(e)

Page suivant(e)