la multitude auec le courage, la fortune auec la vertu, & les richesses
auec les forces, la resolution auec la pieté, & la victoire auec la
clemence, les autres ne peuuent estre victorieux qu’ils ne soient insolens :
cetuy-cy ne pouuant estre vaincu par autruy, est vaincu par
sa Françoise douceur, si les autres Royaumes sont feconds & fertils
en richesses, ce n’est que pour de leurs perles gresler ses couronnes,
leurs odeurs ne sont que pour parfumer ses Autels, & leurs lauriers
que pour estofer ses trophées, ou pour mieux dire des lauriers qui y
croissent, ils n’en reçoiuent que l’ombre, & nous en cueillons le fruit
& la gloire. Ie demande de plus, ô grand Dieu ! Protecteur de nos
Princes, que plein de santé il prolonge l’heureux cours de ses années,
afin qu’il continuë le cours de ses victoires ; Conseruez le premier
Prince de la terre, le Roy de nos cœurs, le Gouuerneur de cette Prouince,
& les delices des peuples, le conseruant vous conseruez
toute la Guyenne, qui a tousiours tant reueré l’Auguste Nom de
LOVIS DE BOVRBON : Vous conseruez la paix dans vne Prouince,
qui a tousiours eu en si grande veneration le Nom de Condé ; faites
qu’apres auoir ioüy de la presence de Madame la Princesse son
épouse, & de Monseigneur le Duc d’Anguien son fils, nous ayons
le bon heur de posseder le pere, & luy témoigner par nos ioyes &
par nos acclamations que toute la Guyenne ne respire que pour son
seruice, que le tonnerre de nos Canons saluë son arriuée, que nostre
musique veut accompagner son Char triomphant, & que tous nos
lauriers veulent couronner sa teste, que tous nos feux d’artifices &
nos feux publics ne sont rien en comparaison du feu brûlant de nostre
cœur.

FIN.