la continuation de la guerre, & les plus censez connoissants
bien que le calme ne peut reuenir ny par
l’vne ny par l’autre demandent des seuretez pour
l’Estat, pour les particuliers, pour les Princes &
pour les puissances.

Mais ou se peuuent rencontrer tous ces auantages
dãs vn temps auquel on n’oseroit en esperer pas
vn, n’est ce point vne belle Idée de Platon qui met
tout le bonheur d’vne Republique dans l’egalité
des conditions ; reflection qui ne peut pas subsister
mesme vn moment dans l’esprit d’vn sage Politique,
il faut bien de fondements plus solides pour
soustenir vne edifice dans lequel nous voulõs loger
le repos & le bonheur d’vne Monarchie qui n’est
guere en estat de receuoir ny l’vn ny l’autre, il faut
pourtant trauailler a ce noble ouurage dont les premiers
& plus fermes fondements sont les six propositions
suiuantes.

I. Personne ne doute que la paix a vn estat
remply de troubles, ne soit le plus grand bien
qu’il puisse receuoir pour son restablissement,
cette Diuine Fille du Ciel porte la sereuité auec elle,
& produit vne heureuse abondance par tout ou
elle se fait voir, qui donne l’accomplissement des
vœux & des souhaits de tout le monde, pour peu
que ce premier epanchement de ses graces continuë
sur vn Empire, elle le rend aussi florissant que
l’aage d’or de la Fable.