& ridicule commerce de ces esprits folets & malicieux
qui s’insinuent chez les grands auec des addresses
malignes & honteuses, & leur dit d’vn ton
mocqueur & agreable, c’est icy où ie veux rire des rieurs
Messieurs les Boufons, Satiriques, Flateurs & Compteurs
des nouuelles, ie vous aduoüe que vostre vie est
digne de risée, vous estes semblables aux violons,
vous suiuez tousiours les festes, & dés qu’on se met sur
le serieux on vous fausse compagnie, de tous les métiers
le vostre est le plus abject & mesprisable, & comme
vous ne cherchez que le secret de tout le monde pour
le porter d’vn lieu à autre, vous auez ce bon-heur que
personne ne vous croit, cela n’empesche pas que vostre
belle humeur ne soit occupée à fournir des matieres.
Pour diuertir l’esprit de ceux qui se seruent de
vous comme des gazettes pour apprendre les nouuelles
quelques fausses qu’elles soit, vous en inuentez vne
partie, & debitez les autres si falsifiées, qu’il est aisé à
iuger que se sont les aduances de quelque extrauagant,
c’est vous qui faites le plus souuent les diuorces
entre les parens & les amis, vous n’exceptez non plus
le Prince de vos caquets que le suiuant, tout passe par
vostre censure, quoy que vous soyez vuides de toute
bonne doctrine, & il me semble qu’aux Monarchies
bien polissées, il y deuroit auoir des peines pour ces
sortes des personnes ou bien qu’ils eussent vne marque
comme les Iuifs en Auignon, pour faire voir que
ce sont des gens ennemis des autres & de toute bonne
societé, & si on m’oppose que ie drape sur moy-mesme
qui suis vn Rieur & vn mocqueur, ie respondray,

Page précédent(e)

Page suivant(e)