Le Card. Ie deuois cette reparation d’honneur à Monsieur le Comte
de Harcourt, dont la gloire ne se pouuoit sauuer que par l’impossibilité de
la prise de cette place, que le mauuais succez de Monsieur le Prince deuoit
persuader à tout le monde. Et de plus, c’estoit des ombres qui deuoient
seruir de relief à la gloire que ie preparois à mon frere. Et puis cette place
estoit si importante, qu’elle eust exposé toute la France, & rompu cette
egalité si necessaire au bien de toute l’Europe.

Le Casuiste. Ces Messieurs me diront aussi, Monseigneur, que vous nous
tailliez de la besogne en Italie exprés pour y enuoyer vostre argent, sous
pretexte d’en enuoyer pour l’entretien des armées du Roy.

Le Card. N’est-il pas iuste que chacun enuoye son petit fait chez soy.
Où en serois-je maintenant si j’auois laissé mon argent en France ?

Le Casuiste. Puisque nous sommes sur l’Italie, Monseigneur, dites-moy
qu’est-ce que ie respondray à ces Messieurs, s’ils me demandent pourquoy
vous auez engagé la France, à supporter contre la Iustice, & l’interest du
Saint Siege les voleurs de ses finances.

Le Card. Il faut dire des personnes qui auoient fait leurs petites affaires.
Voulez-vous que ie vous en dise la raison ? C’est que ie me sentois dans la
mesme condition qu’eux. Et eussiez vous voulu que j’eusse authorisé des
Loix, dont la rigueur se pouuoit exercer sur moy-mesme.

Le Casuiste. Et touchant les affaires de Naples qu’on vous accuse auoir
negligées, Monseigneur, que diray-je à vostre iustification ?

Le Card. Vous leur direz qu’il falloit que ie les laissasse perir pour le bien
de la France.

Le Casuiste. Mais, Monseigneur, n’est-il pas bien important à la France
de détacher ce joyau de la Couronne d’Espagne ?

Le Card. Non, premierement pour conseruer cette diuine égalité, mais
encore pour détourner le mal, qui nous arriue maintenant. Car les Parisiens
commençant à remuer, si j’eusse souffert que les Napolitains eussent esté victorieux,
quel encouragement cela n’eust-il pas apporté à la ville de Paris ?
Et au contraire, voyant le mauuais succez de leur sousleuement, les Parisiens
auoient sujet de craindre le mesme sort & de ne rien remuer, de peur
que la chose ne tournast à leur confusion.

Le Casuiste. Vous voyez que cela n’a de rien seruy, Monseigneur.

Le Card. Cela n’empesche pas que ie n’aye fait ce que ie deuois faire.

Le Casuiste. Si ces Messieurs me demandent, Monseigneur, pourquoy,
voyant le Turc arborer son Croissant dans l’Italie, & eriger les statuës de
Mahomet sur les ruïnes du Crucifix, vous n’auez pas fait la paix pour rendre
de glorieux seruices à toute la Chrestienté, puisque nos Roys estans les Fils
aisnez de l’Eglise, doiuent secourir les premiers, & l’ont fait lors qu’ils
estoient en aage d’estre maistres de leurs actions ?

Le Card. Pour cét effet il nous falloit la paix, & ie vous ay dit que ce n’estoit
aucunement l’interest de la France de la faire. Mais vous seriez bien
estonné si ie vous disois entre vous & moy, que c’est moy qui a porté le
Turc à armer contre les Venitiens.