en ces termes pour obtenir des Arrests en
faueur d’vn nouueau Party ; & enfin la douceur
de ces esperances qu’on auoit données aux
Peuples a esté cultiuée par des protestations
reïterées, lors qu’on a mis les mains sur les deniers
publics, leué les Tailles dans les Prouinces,
& fait les logemens des gens de Guerre.

C’est là, MONSEIGNEVR, que vostre
foy se trouue engagée auec celle de Messieurs
les Princes dans des promesses si solemnelles,
que pour retirer ce depost, il est question de
payer d’effets. Autrement les Peuples, qui apprennent
tousiours la Politique dans l’Eschole
des Guerres Ciuiles, ne manqueroient pas de
remarquer qu’en mesme temps qu’on fait la
guerre à l’infidelité du ministere, on en imite
la deprauation ; Et alors il ne leur seroit rien
plus aisé que de faire retomber les reproches
dont on a couuert la conduite du Card. Mazarin
sur celle d’vn Fils de France, & des Princes
du Sang. Ils diroient ouuertement que
pour les obliger à prendre les armes, on les
a flatez de l’esperance d’vn soulagement imaginaire.

Par ces raisons qui n’ont point de replique,