Anonyme [1649], LES LOVANGES DES PARISIENS, DONNÉES EN L’HONNEVR DV PARLEMENT. , françaisRéférence RIM : M0_2329. Cote locale : C_4_49.
Page précédent(e)

Page suivant(e)

-- 4 --


Dans nos villes & dans nos champs,
Et vous verrez que ces meschans
Sont les pertes des Republiques,
Tout le pays est desolé
Ils ont tout pris & tout volé,
Sans respect de sexe ny d’aage :
Ce ne sont que pleurs & que cris,
Et par tout se trouue l’image
Des restes d’vn fascheux débris.

 

 


Assez a troublé nostre ioye,
Leur insolente cruauté,
Assez de leur auidité,
Nous auons tous esté la proye.
Ces gens de tous haïs & crains,
Perdent mesme les Souuerains :
La disette de leurs Prouinces,
Oste la force à leurs projets,
Et l’incommodité des Princes,
Vient de celle de leurs Subiets.

 

 


Le retour de ces iours plus calmes,
Signalera vostre vertu,
Releuer l’Estat abbatu :
C’est cueillir d’eternelles palmes.
Rendez nostre Roy, quoy qu’enfant,
Tres-grand, heureux & triomphant :
Et monstrez à toute la France
Par vn propice changement,
Que vos loix & vostre prudence
En sont le plus seur fondement.

 

Page précédent(e)

Page suivant(e)

Anonyme [1649], LES LOVANGES DES PARISIENS, DONNÉES EN L’HONNEVR DV PARLEMENT. , françaisRéférence RIM : M0_2329. Cote locale : C_4_49.