qu’elle acquiert l’amitié, & la bien-veillance
du Prince. Puis qu’il est vray qu’il est
plus excellent que les autres hommes & en
vertu, & en valleur, & qu’il est plus éleué
en gloire, faut-il pas croire que sa conuersation
sert grandement à vôtre édification.
Apprenez cecy de l’Europe, qui est vne
Princesse des-interessée, que pour se bien
maintenir en la faueur des testes Couronnées
comme nous, qu’il ne faut pas estre orgueilleux
de nôtre bien veillance, & qu’au contraire,
plus l’on sçait étre dans nos bonnes graces,
& dauantage, doit on se montrer humbles,
& respectueux. L’on ne le sçauroit iamais
étre trop enuers ces personnes Sacrées ;
quoy que l’on die qu’Aristippe n’étant pas
oüy de Denis, se iettant à ses pieds luy dit ; la
faute n’est pas mienne : mais elle est au Roy,
qui a les oreilles à ses pieds. Ce grand personnage
deuoit estre blâmé ayant failly ; puis que
sans vser de l’humilité qu’il deuoit à ce Monarque,
il vouloit faire du compagnon auec
son maistre. Ce que ie dis des Princes, se doit
aussi entendre des Ministres de la iustice, à qui
il faut porter reuerence, comme à vne chose
sainte, & aux Ministres de Dieu. Quoy que
parmy eux il s’en trouue d’iniustes, de cruels,
d’ignorans & de corruptibles, on ne doit pas

Page précédent(e)

Page suivant(e)