peu d’experience, rendez le respect que vous deuez aux princes
de son sang, reconnoissez la justice & la fidelité du parlement,
prenez compassion de vos concitoyens, rendez-vous à
la raison, confessez la verité, songez à vostre conscience, mettez
fin à vostre aueuglement, & ne croyez pas que vos flatteries
& vos impostures soient plus fortes & plus puissantes pour
absoudre le plus abominable de tous les hommes, que les arrests
de tous les Parlemens de France pour le conuaincre & le
condamner.

Vous vous rendez ridicule de vouloir persuader dans la page 17.
de vostre Panegyrique Mazarin, que les soins & les conseils
de ce Ministre aussi fortuné qu’ignorant, ont dompté l’Espagne, protegé
l’Italie, pacifié l’Allemagne, & reculé nos frontieres, apres que
le Roy a declaré à toute la terre par ses lettres patentes du mois
de septembre 1651. verifiées dans tous ses Parlemens ; qu’ayant
reconnu le peu de suffisance du cardinal Mazarin estranger,
dans les affaires de l’estat, & sa mauuaise conduite, voulant remedier
à tous ces desordres, il l’auroit esloigné de sa personne
& de ses conseils, & fait retirer du royaume, auec tres-expresses
inhibitions & deffences d’y rentrer sous quelque pretexte
que ce soit, à peine d’estre declaré criminel de leze-Majesté,
& perturbateur du repos public, &c. C’est estre trop effronté
& trop impudent que de dementir son souuerain si
hautement, & de faire imprimer ce qui condamne sa parole, &
qui choque son authorité, dans son Louure & dans son imprimerie
royale. Si toute la terre ne descouuroit vostre flatterie
en cet endroit, & si tous les hommes qui ont la moindre lumiere
ne connoissoient vos impostures insupportables, ie donnerois
facilement vn liure à tous les bons François pour marquer
en destail les ruines, les desolations, les pertes, les fautes,
les crimes, & les maluersations que vostre cardinal a commises
pour reduire ce royaume fleurissant en l’estat déplorable
où nous le voyons, pendant qu’on luy en a confié le gouuernement.