Cardinal de Richelieu, se persuada qu’il en pouuoit
estre le riual ou le successeur ; & quant il se ressouuint
qu’on l’auoit honoré du Chapeau de Cardinal,
luy qui n’ut pas refusé mesme le Turban, s’il en eut
esté sollicité par quelque present cõsiderable, il porta
plus loing son ambition & son auarice, & voulut
estre Gouuerneur du Roy & premier Ministre de son
Estat, pour estre plus aisément le fleau de ses peuples.
C’est dans ce Ministere naissant qu’il a fait languir
dans les prisons, ou des personnes qui n’estoient coupables
que de n’auoir pas affecté ses crimes, ou qui
n’ont esté mal-heureuses, que pour auoir esté innocentes,
& qui ne luy auoient esté peut estre suspectes
que pour auoir osé prier Dieu de le conuertir. C’est
dans ce Ministere naissant que les Beaufort & les
Houdancourt furent les premiers objets de sa rage,
pour ce qu’ils estoient trop genereux & trop gens de
bien pour en estre les instrumens, & qu’il considera
leur vertu comme vn obstacle, & comme vn rempar
qui s’opposeroit à toutes ses brigues, il fit serrer étroittement
le premier au bois de Vincennes pour tacher
d’y estouffer des qualitez qui ont fait des Dieux dans
le Paganisme : & pour venir à bout du second, il s’efforça
de gaigner vn Parlement, & de violer cette
Vierge d’Hesiode cette belle Reyne du monde,
comme l’appelle Pindare, la Iustice en vn mot, dont
Platon fait le fondement & la colomne des Republiques
& des Monarchies. Ce fut alors vne chose étrange,
qu’vn ennemy de l’Estat fit emprisonner vn Prince
pour la seureté de l’Estat : qu’vn voleur public

Page précédent(e)

Page suivant(e)