CINQVIESME FACTVM,
Pour Messire Philippes de la Mothe-Houdancourt,
Duc de Cardone, & Mareschal de France.

Contenant les iniustes & extraordinaires procedures faites
contre luy, par les artifices du Cardinal Mazarin.

LE Conseil de Monsieur le Mareschal de
la Mothe auoit tousiours iusques icy
differé de publier ce dernier Factum ;
sur l’esperance que Monsieur le Cardinal
Mazarin, Autheur de tant d’iniustices
se changeroit : & aussi sur la crainte
qu’ayant vsurpé tout le pouuoir dans le
gouuernement du Royaume, il ne continuast
à trauerser la liberté dudit seigneur Mareschal, lors
qu’il eust veu tant de veritez descouuertes. Pour semblable
raison le mesme Conseil n’a voulu au secõd Factum rien toucher
des campagnes faites en Catalogne és années 1643. &
1644. dautant que ledit Cardinal est la cause originale des
malheurs qui y sont arriuez : & dans les autres Factums,
comme si ledit Conseil eust voulu flatter ledit Cardinal, il
s’est contenté de dire, qu’il auoit esté surpris par les Ennemis
dudit seigneur Mareschal.

Mais auiourd’huy qu’il continuë en sa mauuaise volonté,
& qu’on a veu depuis peu afficher à Paris & à S. Germain vn
placard calomnieux ; dans lequel la flatterie, qui n’abandonne
iamais les puissances qui regnent dans la Cour des Rois, a eu
d’audace de vouloir faire croire, que sans la douceur dont a
vsé ledit Cardinal enuers Monsieur le Mareschal de la Mothe,

Page précédent(e)

Page suivant(e)

---

La Mothe-Houdancourt, Henri de [?] [1649], CINQVIESME FACTVM, POVR MESSIRE PHILIPPES DE LA MOTHE-HOVDANCOVRT DVC DE CARDONE ET MARESCHAL DE FRANCE. CONTENANT LES INIVSTES ET extraordinaires procedures faites contre luy, par les artifices du Cardinal Mazarin. , françaisRéférence RIM : M0_2849. Cote locale : A_4_8.

---