de Villadamor Menor Aduocat Fiscal de la Ballia general ;
hõme de mesme farine que luy, lequel a depuis esté banny
de Catalogne & priué de sa charge. Il estoit principal artisan
de la coniuration du Bailly de Mataro, confident de la
Barone d’Alby, de l’Abbé de Gallicans, & autres malafestis ;
lesquels auoient entrepris de faire reuolter la Catalogne,
en tuant Monsieur le Comte d’Harcour. Ils furent presque
tous exeutés & Monsieur le Tellier sauua lors du naufrage
ce Docteur, pource qu’il le iugoit necessaire à instruire
le proces de Monsieur le Mareschal. Ledit Docteur demeura
neantmoins tellement suspect & pour de mauuaises actions
qu’il fit depuis, qu’à la poursuitte du Procureur fiscal de la
Cour du Regent de la Vicairie, le procez luy fust faict & fut
condamné. Monsieur le Cardinal & le Tellier afin de le récõpenser
du plaisir qu’il leur auoit fait en persecutant Monsieur
de la Mothe l’ont retiré à Paris, & creé Conseiller d E’stat,
& fait donner la subsistance par le Roy.

Par les informations sur lesquelles ledit Docteur a esté
condamné, il ce voit qu’il a faict deposer cõtre Monsieur le
Mareschal vn appellé Boffil en luy promettant 50. liures
Catelãs de pẽsion sur le secrets de Tortose : qu’il a tenté d’en
faire autant à vn nommé Pocuelo Prestre du diocese de
Leyde, luy promettant, (disoit il) par ordre du Vice-roy
trois cent liures de pension sur les biens confisquez ; qu’il
offrit vingt doublons à vn appellé André Villar auec promesse
d’vn benefice s’il vouloit deposer. Puiolar s’en mesloit
mesme du costé de France, ayant dit au R. P. D. Ioseph
parent Religieux de la Trinité, qui s’en retournoit en Catalogne ;
que s’il vouloit deposer contre Monsieur le mareschal
de la Mothe, il luy feroit donner cinq cens liures de pension.
Il se rencontre en ces informations vne particularité
estrange laquelle fait paroistre les moyens desquels se
sont seruis le Cardinal & le Tellier pour animer la bonté de
la Royne Regente, contre monsieur le Mareschal ; que Iaques
Al[1 lettre ill.]es habitant de Leyde depose, que Chirat & le Docteur
Marty l’ont solicité plusieurs fois auec promesse de