d’humilité : son habit ordinaire estoit de simple
camelot, sa table fort modeste, sa suitte assés petite,
sçachant bien qu’vn Roy qui commande
absolument sur les volontés de son peuple, n’a pas
besoin de beaucoup de soldats, pour la seureté de
sa personne.

Humilité
glorieuse
de sainct
Louys Roy
de France.

Descendons plus bas, & venons à François I.
tant renommé pour ses batailles, & pour ses glorieuses
entreprises ; on tient qu’il receut vn iour
vne lettre du Roy d’Espagne, par les mains d’vn
de ses Ambassadeurs, qui pour montrer la grandeur
de son maistre, luy donna plusieurs riches
Tiltres, le qualifiant Roy de Castille, Roy de
Leon, Roy d’Arragon, Roy des deux Siciles,
Roy de Hierusalem, Roy de Portugal, Roy de
Grenade, Roy de Tolede, Roy de Valence,
Roy de Galice, Roy de Courdouë, Roy de Iaen,
&c. Sa Maiesté entendant ce discours, se prist à
soûrire, & pour reprimer le fast Espagnol, elle se
contenta du seul Tiltre de Roy de Gentilly, village
situé proche de Paris, témoignant par cette
sage replique, que la veritable Royauté, ne consiste
point dans des titres imaginaires, pris à
plaisir, pour flatter l’ambition des Souuerains,
mais qu’elle dépend plustost de la parfaitte soumission
des peuples, & de l’estenduë de la Monarchie
Françoise ; qui ne cede rien en Noblesse,
en dignité, en antiquité à tous les Empires de
l’Europe.

Gentille
response
de Frãçois
I. qui marque
son
humilité.