Que le public a grand interest en la Royale
vertu d’vn Ieune Prince.
CHAPITRE III.
IL n’appartient qu’aux vieux Capitaines, vsez,
& consommés dans les fatigues de la guerre,
de sçauoir, combien la personne d’vn Roy est
importante dans les combats, ils la tiennent plus
chere, qu’vne Florissante Armée : l’œil du Prince,
encourage les lasches, fortifie les foibles, anime
les poltrons, & remet le cœur à ceux qui se
trouuent saisis d’vne crainte panique ; la presence
d’vn Monarque fait renuerser les murailles des
villes, prendre les forteresses, voler aux assauts,
bref, rien n’est impossible à des soldats, qui combattent
à la veuë de leur Prince. D’où vient, que
les Empereurs Romains, n’ont iamais mieux
reüssi dans leurs desseins, que quand ils ont conduit
leurs Armées, & qu’ils ont marché à la teste
de leurs trouppes : & ie puis, sans flatterie, asseurer
de nos Roys, qu’il n’est point de Prince dans
l’Europe, si souuent couuert de poussiere, halé
du Soleil, fatigué de la campagne, pour soutenir
les interests de ses sujets, comme nos Souuerains,
qui exposent volontiers leurs personnes,
pour la conseruation de leurs Estats.
Tu vnus
pro decent
millibus
computaris.
2. Reg 18. 3.
La Mère de Dieu, Pierre de (dit Bertius, Abraham) [1647],
LES VERTVS ROYALES D’VN IEVNE PRINCE. , français, latin
Référence RIM : Mx. Cote locale : B_1_1.