Bourdon, pareillement il nomme,
Quoy que Procureur honneste homme,
Et tient pour insigne bon-heur,
D’estre du Prince Procureur ;
Le Mazier est pour la Duchesse,
Qui jadis fut plus que Princesse,
Bourdon appelle l’Aduocat
Gaultier, à qui faut maint ducat,
Pour faire plaider vne cause,
Car peu d’argent ne l’y dispose ;
Aussi beaucoup cét homme vaut,
A ses Cliens qui point ne faut,
Et s’il prend auec allegresse,
Il les deffend auec addresse,
D’où vient que Monsieur de Condé,
De le prendre n’a marchandé.