Sonnet sur le mesme sujet.

 

Qvand par vn double effort d’adresse & de courage
Promethée enleua du haut du Firmament
Ce qu’auoit de plus pur le plus noble Element,
Afin de donner vie à sa nouuelle image :

 

 

Il vid proche d’vn muid plein de fort bon breuuage
Bacchus tout ieune encore estendu plaisamment,
Assoupy de vapeurs, ronflant profondement,
Sans soucy des mortels, & sans crainte d’outrage.

 

 

Luy, voyant qu’il pourroit, sans troubler son repos,
Le prendre adroitement, l’emporta sur son dos,
Et pour luy preparer vn sejour qui fust leste,

 

 

Il façonna mon corps comme vn Ciel portatif,
Clair, poly, transparent ainsi qu’vn corps celeste,
Pour y garder chez luy cet Illustre Captif.

 

PERMISSION D’IMPRIMER.

Il est permis à Iean Paslé, Marchand Libraire à Paris, d’imprimer ou faire imprimer, vendre
& debiter vn Poëme intitulé, LA PIECE DE CABINET, composé par le sieur
CARNEAV, auec defenses à tous Imprimeur, Libraires & autres, de quelques qualitez &
conditions qu’ils soient, de l’imprimer, ny contrefaire, à peine de trois cens liures d’amende,
confiscation des exemplaires, & de tous despens, dommages & interests. Fait ce 14 May 1648.

Signé, DAVBRAY.