autrefois : I’ay esté bon drolle, & peut-estre aussi dessalé
que tu peux estre, & si en fin ie n’ay point trouué meilleur
potage que celuy que ma pauure femme Guillemette
m’apreste d’ordinaire. En ce temps-là ie courois
quelquesfois à la picorée, quelquesfois ie faisois du
butin ; tantost de trois ou quatre vaches, tantost de
quelque bon cheual, ou de quelque poulain, & si de
toutes ces petites fredennes là, ie n’ay sçeu iamais en
acquerir vn poulce de terre : bel exemple, pauure garçon,
pour t’inciter à ton deuoir, & à la recognoissance
de tes fautes !

LE SOLDAT.

HÉ quoy ! ie seray donc contraint de me reduire
au petit pied, & de sonner la retraicte, sans
pouuoir espargner de mes fatigues vne poire pour
la soif ?

LE PAYSAN.

Foy d’homme ie te le conseille, le plustost que tu
pourras : car si tu attends que nostre bon Maistre
se mette en cholere, ie ne voudrois pas donner vn liard
de ta peau : & puis toy-mesme recognoissant ta faute,
il ne seroit besoing d’autres tesmoings que toy : C’est
pourquoy, compagnon, tu te retireras, si bon te semble ;
quant à moy ie ne t’en diray plus aucun mot.