De ta condition, malheureux, ha pauure aueuglé de prosperité ! Ne
te souuient-t’il plus de ton origine ; & que tu fis ta sortie, ou bien ton
pere, d’vne maison couuerte de chaume, où la toille d’araignée seruoit de
tapisserie ? & qu’estant venu icy arme seulement de plume & d’argot, tu
as si bien volé de l’vne & serré de l’autre, que tu t’es éleué si haut ? mais
ne t’afflige point de ta cheute, encore que tres-asseurée, tu ne sentiras
point le mal qu’elle te fera, car tu tomberas sur rien.