Cette consideration, que l’Estat ne peut exiger
ny mesme esperer iustice de son Souuerain, à moins
que le Souuerain ne soit en pouuoir de la luy rendre
par le moyen de la soumission qu’il rencontrera
dans la dependance de tous ses sujets ; fair, que l’Estat
est obligé de prendre à partie tous ceux qui seront
assez insolens pour attenter à ce Souuerain, par ce
que la raison qui luy fait esperer iustice de l’exercice
de son authorité, la mesme, l’oblige à la luy maintenir
inuiolable, pour estre en droit de la pouuoir exiger :
Et puis qu’il n’est point de moyen de maintenir
cette authorité souueraine inuiolable entre les
mains d’vn Monarque, à moins qu’on ne le rende
redoutable à tous ceux qui pourroient attenter aux
Loix, il faut donc necessairement que l’Estat s’interesse
à la vengeance de tout ce qui le pourroit offencer :
cela est sans replique.

Il s’ensuit de ce raisonnement ce me semble, que
toutes les entreprises qui sont capables de porter
quelque empechement à l’exercice de l’authorité
Souueraine, ou d’en eneruer en aucune façon la
vigueur, sont des crimes d’Estat, par ce que l’Estat
est obligé de s’en ressentir par le seul motif d’vne
vengeance publique ; & par ce que le Roy se trouue
le dispensateur de cette authorité souueraine, il s’ensuit
manistement que tous ceux qui attentent à sa
personne sont directement criminels d’Estat :
poussons encor plus auant.