[retour à un affichage normal]

Accueil > recherche > Affichage d'une occurrence en contexte

Mazarinade n° D_1_12

Image de la page

Anonyme [1649], LE PROCEZ, L’ADIOVRNEMENT PERSONNEL, L’INTERROGATOIRE, ET L’ARREST DE MORT DV ROY D’ANGLETERRE. Auec ce qu’il dit & fit deux iours auant sa mort: Et la Harangue qu’il prononça sur l’échaffaut. Selon le rapport de plusieurs Gentils-hommes Anglois qui y assisterent, & meirent le tout sur des tabletes. Fidelement traduit de l’Anglois, par le sieur DE MARCYS, Interprete & Maistre pour la langue Françoise du Roy d’Angleterre regnant à present, & de son Altesse Royale Mgr le Duc d’York son Frere. , françaisRéférence RIM : M0_2888. Cote locale : D_1_12.


vne somme d’argent, aussi a esté ce Prince ; Iesus-Christ sut mené deuant
les Iuges de sa Patrie & accusé de crimes supposez ; ce Prince a esté traitté
de la mesme sorte ; Iesus-Christ fut insolemment traitté des satellites, il
fut mocqué, baffoué, & enfin mourut par la main des bourreaux ; ce
Prince a souffert les mesmes ignominies, comme vous pouuez voir dans
la Relation cy-dessus. Mais le rapport aduantageux que ie trouue de cette
mort auec celle de Iesus-Christ, est que Nostre Sauueur contracta vn
mariage eternel auec son Eglise, & que le Roy d’Angleterre a espousé
vne fille de l’Eglise, vne Princesse, fille, sœur, & tante des Fils aisnés de
l’Eglise, qui ne cesse point d’animer le Ciel par ses prieres, & la terre par
son infortune, & qui obligera enfin l’vn & l’autre, à chasser les demons
de l’Angleterre, pour y restablir la Croix.
 
Il y a environ
cent ans que le
schisme commẽça
en Angleterre.
Mais j’entends des-ja vn doux murmure qui frappe nos oreilles. L’ame
de ce Prince ne fut pas si-tost dans le Ciel, qu’elle obligea la belle
Astrée de descendre icy bas : elle part le glaiue à la main & la balance de
l’autre, & d’vn vol iuste & compassé, estend ses plumes blanches & dorées
sur la Metropole de l’Vniuers ; La paix marche sur ses pistes, & vient
planter vn Oliuier incorruptible dans le Palais de cette Deesse. Les Princes
Chrestiens partent de tous costez pour luy rendre hommage, &
protestent qu’elle sera desormais la regle & le fondement de leurs
actions. C’est dans cette grande ville de Paris, le centre de l’Europe
Chrestienne, & le Theatre des grands projets, que se doit former vne autre
Croisade, pour exterminer ces meurtriers de Reynes & de Roys. Les
Villes sont des conquestes trop chetiues pour des Princes si belliqueux ;
leur valeur doit auoir pour matiere des Isles & des Royaumes entiers ; &
pour but & couronnement vn Royaume eternel. C’est dans cette Isle
barbare qu’ils feront leur coup d’essay pour venger l’Eglise de Dieu, &
puis ayant estouffé les monstres domestiques, ils pousseront iusques dans
la Palestine leur sainte valeur, pour estouffer d’autres barbares qui prophanent
les lieux que la presence de Nostre Sauueur a rendu sacrez ; Et
nous verrons nostre ieune Roy, digne successeur de Saint Louis, arborer
la Croix sur les ruïnes des Idoles de Mahomet, & les Lys que sa valeur
antera au pied de l’Arbre de la Croix, rendront vne odeur si suaue par toute
la terre, que la qualité de Chrestien fera par toute la terre la definition
de l’homme.

FIN.