[retour à un affichage normal]

Mazarinade n° A_8_32

Image de la page

Anonyme [1649], LE RAMEAV ROYAL, OV LE SYMBOLE DE LA PAIX, PRESENTÉ A LA REYNE, LE IOVR DES RAMEAVX. , françaisRéférence RIM : M0_2975. Cote locale : A_8_32.

de bien, & les aura comblez du bon-heur qui leur est
le plus souhaittable. Cõdescendez, Madame, pour ce
coup à la foiblesse du peuple, acceptez ses offrandes
& ne luy deniés pas vne grace qu’il a demandée auec
tant de soupirs & tãt de larmes. Vous ne diminuerez
rien pour cela de vostre authorité, vostre gloire n’en
sera point abbaissée, au contraire on vous reconnoitra
toute puissante, quand vous aurez à la main ce qui
soumet les peuples & qui les force de faire par abondance
d’affection, ce qu’ils ne faisoient que par la loy
du deuoir. On vous erigera des trophées par tout
où vostre nom sera connu : & tout le monde s’efforcera
de le rendre glorieux à la posterité. Dieu qui a eu
tousiours de l’amour pour son peuple, s’est assez souuent
laissé fléchir par ses prieres, & luy a souuent
donné la Paix, lors mesme qu’il le croyoit tout
prest de chastier, il luy a fait sentir son pouuoir si-tost
qu’il l’a veu sur le poinct d’estre opprimé, &
luy a mieux fait connoistre dans ses necessitez que
dans ses abondances, qu’il estoit son Souuerain.
Ceux qu’il employoit à ces grands effets de sa prouidence,
estoient tousiours quelques grands personnages,
& quelquesfois quelques femmes fortes. Il
leur mettoit la verge en main ou le couteau, afin de
les rendre venerables à ses peuples & redoutables
à leurs ennemis. Vous, Madame, qu’il a choisie pour
regner dans vn pays qu’il semble auoir cheri plus
que les autres dés le commencement de la Monarchie,