[retour à un affichage normal]

Mazarinade n° A_8_32

Image de la page

Anonyme [1649], LE RAMEAV ROYAL, OV LE SYMBOLE DE LA PAIX, PRESENTÉ A LA REYNE, LE IOVR DES RAMEAVX. , françaisRéférence RIM : M0_2975. Cote locale : A_8_32.

> fortes, & vous aurez encor le premier rang parmy les
Heros, si vous acheuez bien ce que vous auiez assez
heureusement commencé. Vos armes ont terrassé les
plus puissans Ennemis de vostre Regẽce en plusieurs
batailles, dont vous auez remporté les auantages :
mais vous n’auez encor rien fait, si vous ne faites sentir
aux Peuples ces mesmes auantages, & si vous ne
leur distribuez liberalemẽt le fruict de tant de cõquestes
qu’ils ont cultiué, sans en auoir encor pû gouster.
 
Il faut, Madame, que vous couronniez tant de hauts
faits par vne derniere action, qui sera plus illustre que
toutes les autres, & qui est pourtant la plus facile à
produire. Vostre peuple a contribué toutes ses forces
à la rendre aysée par des Armées nombreuses, dont il
a soustenu le poids & doublement payé la despense.
Apres que toutes ces entreprises ont reüssi si auantageusement
pour vous, il a iuste raison d’en demander
quelque auãtage, qui ne diminuë rien des vostres : Au
cõtraire, il vous a ouuert toutes les voyes par où vous
pouuiez les accroistre. Et aujourd’huy il vous va rendre
la plus renommée & la plus glorieuse Reyne du
monde, si vous receuez les palmes qu’il vous presente,
& si vous executez ce qui le peut rendre heureux.
Donnez à vous-mesme, Madame, cette Couronne
de gloire, que tant de Heros n’ont pû gagner apres
tant d’efforts genereux. Ne la refusez pas, tandis qu’elle
se presente, sa conqueste n’est pas d’vn iour, vos predecesseurs
se sont efforcez plusieurs années de l’acquerir,