[retour à un affichage normal]

Accueil > recherche > Affichage d'une occurrence en contexte

Mazarinade n° C_9_81

Image de la page

Anonyme [1649], LE RETOVR ET ACHEMINEMENT DV ROY PRES DE PARIS. , françaisRéférence RIM : M0_3532. Cote locale : C_9_81.



L’arriuée de son Altesse Royale dans Paris n’est
pas vne petite asseurance du bon-heur que nous attendons.
Ce Prince qui est doüé d’vne singuliere
bonté pour toute la France, & particulierement
pour Paris, a dit tout haut que le Roy ne songeoit
plus aux desordres passez ; & que ce n’estoit
pas le ressentiment qui le faisoit tenir loin de Paris,
mais seulement le besoin de ses affaires, & que
dans peu de temps nous aurions le bien de le reuoir
icy. Apres les paroles de ce grand & genereux
Prince se trouuera-il quelque personne assez opiniastre,
& assez incredule pour ne le pas croire ? Se
trouuera-il encore des esprits broüillons, & factieux
qui n’ont autre dessein que de fomenter la diuision
parmy nous, pour semer des bruits scandaleux
que le Roy garde le souuenir des Barricades, &
de toute la guerre passée, comme si le Roy ou la
Reine auoient des ames malignes, & basses ainsi
b/> que les personnes qui en parlent auec si peu de raison,
non il faut croire que le bien, & le repos des
sujets occupant l’esprit des Souuerains, il n’y a point
de place pour des pensées qui luy sont si contraires,
& que ce sont des Peres qui brulent les verges apres
auoir chastié leurs enfans. Concluons donc que dans
peu nous reuerrons icy la Cour viure de la mesme
sorte qu’elle a fait autrefois, pourueu qu’aussi nous
viuions dans le respect, & dans l’obeïssance ordinaire.

FIN.