[retour à un affichage normal]

Mazarinade n° B_10_4

Image de la page

Anonyme [1652 [?]], LE ROYAL AV MAZARIN Luy faisant voir par la raison & par l’histoire. I. Que l’authorité des Roys sur la vie & sur le bien des Subjets est fort limitée, à moins qu’elle ne soit tirannique. II. Que l’authorité des Princes du Sang est essentielle dans le gouuernement. III. Que l’authorité des autres Parlemens de France, pour les affaires d’Estat, est inferieure & subordonnée à celle du Parlement de Paris. IV. Que les Prelats n’ont point d’authorité dans le maniment des affaires d’Estat, & que leur deuoit les engage de n’auoir d’attachement que pour le sanctuaire. , françaisRéférence RIM : M0_3561. Cote locale : B_10_4.

Considerez Xerxes dans l’extrauagance de cette
presomption ambitieuse, qui luy faisoit croire que
l’Ellespont deuoit releuer de son pouuoir ; & qu’en
punition du rauage que ce destroit orageux auoit fait,
pour rompre ce superbe pont de bateaux, qui ioignoit
l’Europe auec l’Asie : c’est à dire, Sestos & Abidos ; il
pouuoit enchainer ses flots victorieux, & les obliger
par vne soumission forcée, à respectter inuiolablement
l’empire de ses Loix.
Si l’ambition ne se fust emparée des esprits foibles,
l’authorité des Souuerains n’eut iamais transgressé les
Loix, que la Iustice luy auoit prescripts : Et ce pouuoir
absolu, qu’ils ne tenoient que de la liberté toute
pure de leurs Subjets, maintenu dans cette belle innocence
de sa premiere origine ; n’eut iamais veu ces tragiques
reuolutions des Estats, que les Histoires nous
font considerer dans tous les âges, comme les triomphes
ordinaires de la fortune.
Tarquin ne perdit le Sceptre chez les Romains, que
pour auoir voulu faire passer vn coup de tyrannie, pour
vn coup d’vne authorité legitime. Appius ne termina
le Decemvirat chez les mesmes, que par vn attentat
de mesme nature ; Et pour n’amuser pas mes Lecteurs,
qui sont plus sçauans que moy dans les Histoires :
N’est il pas constant par l’experience de tout
ce que l’antiquité nous fait detester denuëment funeste,
que tous les changements des plus puissans Estats
n’ont iamais esté causez que par des vsurpations d’authorité ;