Mazarinade n° B_11_22
Image de la page
Anonyme [1652], LES SENTIMENS D’VN FIDELLE SVIET DV ROY, Contre l’Arrest du Parlement du vingt-neufiesme Decembre 1651. , français, latinRéférence RIM : M0_3648. Cote locale : B_11_22.
Iuges : on a deferé, & on s’est arresté au témoignage seul
d’vne personne si considerable par le rang qu’elle tient dans
l’Estat, quoy que l’on sçache bien que dans le procez de
Monsieur de Thou & de Monsieur de Saint-Mars grand Escuyer
de France, lequel fut traité par des Commissaires, les
gens de bien soustinrent qu’vne Declaration de sa mesme
Altesse par escrit n’estoit pas valable, ny capable de faire foy
en Iustice, comme on dit, pour estre dénuée des formes legitimes
qui sont marquées par le Droict.
Apud Sirmond,
tom.
2. Concil.
Gall. ad an.
835. pag. 567
Et ie m’asseure que ceux qui verront icy cét illustre nom
de Thou, se souuiendront en passant, que Monsieur le Cardinal
ayant appuyé Monsieur de Thou, contre Monsieur de
Blanc-mesnil, dans leur dispute pour le rang en la premiere
Chambre des Enquestes, plusieurs ont estimé, que le ressentiment
de cette famille si puissante, l’a depuis engagée, au
moins pour vn temps & sans en preuoir les funestes suites,
dans les nouueaux troubles qui menacent ce Royaume d’vne
entiere desolation.
Quoy qu’il en soit, il paroist assez à mon aduis, par les raisons
que ie viens d’alleguer, que l’Arrest nouuellemẽt rendu
en la Cour des Pairs, contre la vie de Monsieur le Cardinal,
est vn Arrest sans force aussi bien que sans forme, & vne condamnation
auortée, tumultuaire, nulle & inualide, pour
auoir esté manifestement portée, cõtre l’ordre iuridique, qui
doit donner vigueur aux loix des Magistrats & des Souuerains
mesmes ; d’où vient aussi que le plus eloquent homme
que vit iamais Rome, voulant d’abord monstrer que son amy
auoit esté cruellement banny, par la faction de ses aduersaires,
ne trouua point de plus in faillible preiugé de l’innocẽce
de cét accusé, & de l’iniustice de ses Iuges, que de representer
à l’entrée mesme de la plus accomplie de ses harangues, que
le lieu public où il alloit plaider la cause de Milon, estoit de
tous costez enuironnée d’armes & de gens de guerre, & que
de quelque part que l’on tournast les yeux, on ne découuroit
aucune trace de l’anciẽne forme, & de la premiere coustume
qu’on auoit gardée dans les iugemens publics. Tamen hæc noui
iudicij noua forma terret oculos, qui quocumque inciderint veterem
consuetudinem fori, & pristinum morem iudiciorum minime vident.
Image de la page