[retour à un affichage normal]

Accueil > recherche > Affichage d'une occurrence en contexte

Mazarinade n° A_3_14

Image de la page

Anonyme [1649], L’AMBITIEVX OV LE PORTRAICT D’ÆLIVS SEIANVS EN LA PERSONNE DV CARDINAL MAZARIN. , françaisRéférence RIM : M0_73. Cote locale : A_3_14.


De mesme les traistres, meschans, & pernicieux, consultent les
menées de leurs deuanciers, lors qu’ils veulent executer quelque
mauuaise entreprise. Il en a esté de mesme de Mazarin, il a fallu
necessairement qu’il ayt cherché vn modelle pour se façonner :
pour moy ie croy qu’Ælius Sejanus est son Maistre, voyons quelle
sympathie & correspondance nous trouuerons entre ces deux personnages.
 
Ælius Sejanus prit naissance en Toscane, de parens de mediocre
condition & biens, & Mazarin en Sicile (isle subjette au Roy
d’Espagne, & ennemie capitale des François) d’vn pere de tres-vile
condition, & tres-pauure en biens : Sejanus est taxé d’auoir
consenty aux voluptez d’Apicius Cheualier Romain ; Mazarin à
celles de Sachety Italien : Ælius Sejanus fut choisi par Tibere pour
le seruir, & le fit son fauory à cause de la gentillesse de son esprit ;
Mazarin a veritablement esté admis au Ministere des affaires de
France, mais non pas par la generosité ny bonté du sien, ny par le
choix du Roy, ains par l’intrigue du Cardinal de Richelieu.
Quand Sejanus se vit possesseur des bonnes graces de Tibere
son Maistre, il fit en sorte d’exiler & esloigner de sa personne plusieurs
nobles & honorables familles ; que n’a pas fait le Cardinal
Mazarin en semblable rencontre, toute la France le sçait, sans le
déduire en particulier.
Sejanus pour ses mauuais deportemens craignant les gardes fidelles
de l’Empereur son Maistre, encores qu’il en fut le seul Capitaine,
ne laissa de les faire esloigner de la personne sacrée dudit
Empereur : Et Mazarin voyant que les Mousquetaires du Roy de
France le sien, veilloient trop sur ses deportemens les a fait congedier.
Ælius Sejanus pour fortifier son party prenoit les thresors de
l’Empire, enrichissant luy & ses amis : Et Mazarin plus habile dans
le cõmencement de sa fortune, a non seulement fait par ses emissaires
le trafic de regratier, mais encore a pris & fait emporter tout
le thresor du Roy. Si Tibere a en plein Senat appellé Sejanus le
compagnon de ses labeurs : Mazarin par vn orgueil insupportable
a non seulement voulu se comparer auec sa Majesté Tres-Chrestienne,
mais encore se rendre maistre de sa personne sacrée. Ayant
esté necessaire à l’Empire d’enuoyer en Affrique vn Proconsul,
Blesus homme de neant par le credit de Sejanus, fut preferé à Lepidus
homme de condition & de courage : Et de nostre temps