[retour à un affichage normal]

Accueil > recherche > Affichage d'une occurrence en contexte

Mazarinade n° B_15_27

Image de la page

Anonyme [1652], L’AVTHORITÉ DES ROYS, DES PRINCES, DES REPVBLIQVES, ET DES PARLEMENS. Presenté au Roy dans la Ville de Pontoise par vn grand Prelat. , françaisRéférence RIM : M0_434. Cote locale : B_15_27.


De là s’ensuit la hayne vniuerselle de tous leurs suiets,
& à la fin leur ruyne, comme dit fort bien Ciceron.
 
Agesilaus Roy des Lacedemoniens, Souloit dire
qu’il estimoit la Iustice pour la premiere de toutes les
vertus, & que la force & proüesse ne valloit rien sans
icelle, & que si tous les hommes estoient iustes, on
n’auroit que faire de la proüesse. Et comme vn iour
quelques Ambassadeurs furent venus vers luy, pour
traicter de la part de leur Maistre, qu’ils disoient estre
vn grand Roy, & ne voulans accorder ce qui estoit
raisonnable, disans que leur grand Roy vouloit autrement
faire, en quoy (dit Agesilaus) est-il plus grand
que moy s’il n’est plus iuste ?
Pensez à cela, SIRE, & discourez vn peu par vostre
prudence, sur ces considerations, voyez en quoy
vous y deffaillez, & auec la grace de Dieu, & le conseil
des Sages, mettez à bon escient la main à vne bonne
& salutaire reformation, de vous premierement &
de toutes choses en consequence, & en ce faisant vous
ferez iustice, sans la quelle il n’y a moyen de reparer les
desordres que nous voyons en ce Royaume.
Le propre d’vn bon & magnanime Roy, est d’auoir
le cœur haut & genereux : vn cœur bas & lasche, n’est
point vn cœur de Roy. Or la generosité d’vn Prince,
ne paroist d’auantage, dit Ciceron, que par la Iustice,
& en faisant obseruer les bonnes Loix, pour lesquelles
il doit mespriser toutes autres choses mondaines.
L’homme genereux, & qui a le cœur bien assis, comme
l’on dit, n’est point auaricieux, & ne songe point à
faire son profit particulier, ains celuy du public, qu’il