[retour à un affichage normal]

Mazarinade n° B_3_3

Image de la page

Anonyme [1652], L’ESPRIT DV FEV ROY LOVIS XIII. A SON FILS LOVIS XIV. Luy monstrant que la mauuaise conduite de Mazarin, est la cause des troubles de l’Estat. Et luy donnant les moyens infaillibles de les appaiser, par son retour en sa bonne Ville de Paris. , françaisRéférence RIM : M0_1287. Cote locale : B_3_3.

honoré de vostre amitié, aime vostre personne
& vostre Estat plus que sa personne & sa
vie, & se sacrifie entierement à vos interests, plustost
qu’il ne sacrifie les vostres aux siens, & ne
tasche de vous y sacrifier vous mesmes : ce qui est
le souuerain point de meschanceté dans vn Ministre :
& pour en estre mieux esclaircy, iugez en
par les effets, aprés auoir chassé la preoccupation
qui vous fait iuger fauorablement de ses plus
noires actions : & voyez sur tout, qu’on ne peut
nier pour luy, que pour estre mis au rang des larrons
& des voleurs, il ne soit depuis deux ans
deux fois entré en vostre Estat par la bréche,
auec vne violence cause d’vne grande effusion de
sang : & c’est ce qui vous doit ouurir l’esprit à la
connoissance de ses vices & de ses defauts. Ne
vous laissez point aussi piper à ses caresses, puis
que la necessité de ses affaires vous les fait,
plustost que son zele & son inclination à vous
honorer. D’ailleurs l’auantage qu’il en pretend
vous les doit rendre suspectes, & vous estes cependant
reduit à ce point de croire, ou que toute
la France, qui l’accuse, & qui vous monstre
euidemment tous ses crimes & toutes ses concussions,
est pleine de fourbes, d’insensez, & d’hypocondriaques,
ou que l’Italie n’a iamais produit
vn plus grand fourbe, vn plus grand voleur,
& vn plus grand enchanteur & filou que
luy. Peut-estre dira-t’il que les troubles ont preualu