[retour à un affichage normal]

Mazarinade n° B_17_22

Image de la page

Anonyme [1652], L’INTERPRETE DV CARACTERE DV ROYALISTE, Monstrant à Agathon quelle a esté la conduitte de Monseigneur Seguier, Chancelier de France, dans tous ces emplois. , françaisRéférence RIM : M0_1722. Cote locale : B_17_22.

quelle leur peut estre vtile : il sentira tost ou
tard que quelque bonne mine que luy fassent
à present les Princes, ils condamnent & abhorrent
en leur cœur sa perfidie, & que lors qu’il
plaira à Dieu nous donner la Paix, & reünir la
Maison Royale, ces ames Heroïques seront les
premieres à conseiller au Roy d’abandonner à
sa Iustice ce mauuais Ministre, pour en faire vne
punition aussi exemplaire comme son crime
est sans exemple, & veritablement Agathon ;
il est tel, que ie n’estime pas que l’on puisse trouuer
vn terme assez significatif, pour exprimer
l’horreur que chacun en peut conceuoir en son
esprit, celuy de Dezertion, Perfidie. Trahison,
& autres de cette espece sont trop doux & indulgẽs,
& quãt ils seroient tous assemblez pour
en faire vn composé, il ne seroit pas encor suffisant
pour declarer le mal que cét homme fait
au Roy, au Public & à luy-mesme.
 
C’est en effet vn monstre qui doit estre en
abomination à tous les gens de bien, & lors
que Dieu qui tient en sa main les cœurs des
Rois & des puissances de la terre, nous fera la
grace de disposer les affaires de la France, à la
conclusion d’vne bonne paix : Il faut par le
traite qui en sera fait en excepter ce monstre, &
laisser son crime dans la condition des cas execrables
qui ne peuuent iamais estre abolis.