[retour à un affichage normal]

Mazarinade n° B_17_22

Image de la page

Anonyme [1652], L’INTERPRETE DV CARACTERE DV ROYALISTE, Monstrant à Agathon quelle a esté la conduitte de Monseigneur Seguier, Chancelier de France, dans tous ces emplois. , françaisRéférence RIM : M0_1722. Cote locale : B_17_22.

mettez en peine ; & que ne pouuant bien establir
le iugement que ie fais de ce personnage,
sans ioindre à sa derniere action les precedentes,
& les exposer à vostre veue telles que ie les puis
connoistre ; C’est beaucoup gesner mon esprit,
lequel estant assez occupé à la reformation de
mes propres manquemens, ne doit pas se diuertir
à la consideration & representation de
ceux d’autruy : Receuez donc comme vne preuue
tres-asseurée de mon amitié ce que ie vous
vay dire de cet homme, qui par sa brutale ambition
s’est degradé de la dignité d’Officier de
la Couronne, & de chef de la Iustice de tout le
Royaume, pour tenir son rang dans vne Compagnie
de rebelles, & criminels de leze-Maiesté ;
ce changement est prodigieux & contre
la nature de l’homme, qui n’est distingué d’auec
les brustes que par la raison.
 
Il estoit desia dans vn âge auancé lors que
par vne deuotion fainte ou veritable : Il s’alla
renfermer dans les Chartreux de Paris, pour
y estre receu à prendre l’habit de Religieux :
Mais ces bons Perés estans aduertis que le President
de Villiers son oncle l’auoit destiné pour
estre le successeur de ses biẽs & de son Office, luy
dirent ne pouuoir pas luy accorder l’effet de sa
postulation sans en auoir auerty Monsieur son
oncle, & fait les efforts possibles pour obtenir