[retour à un affichage normal]

Mazarinade n° C_6_38

Image de la page

Anonyme [1649], L’OBIET DE LA HAINE PVBLIQVE OV LA HONTE DV MINISTRE D’ESTAT DÉCOVVERTE. , françaisRéférence RIM : M0_2564. Cote locale : C_6_38.

Qu’on ne s’estonne donc pas s’il n’y a
rien que de bas & de honteux dans le Mazarin,
puis, qu’il est de tres basse naissance : Mais ce n’est
pas ce la dont ie le blasme, c’est de n’auoir aucune
crainte de Dieu ; quoy qu’au dire des sçauans elle
soit la fidelle gardienne de la societé entre les
hommes. C’est vn estrange abus, que dans vn
Royaume pieux & craignant Dieu, ayant a present
vn Roy qui a tous les traits de cette vertu, on
aye admis au ministere vn homme sans religion
& sans pieté.
 
Ie ne dis rien en cela qui ne soit sçeu de tout le
monde, & publié par tout ou il y a des ames qui
soient capables de quelque sentiment de pieté. Ie
pense pouuoir dire icy auec hardiesse, qu’il ny en
a pas vn de ceux mesme qui sont atachez à sa fortune
par leur propre interest qui osast contredire
cette verité. Ne faut il donc pas auoüer que c’est
faillir contre toute sorte de maximes, d’aprocher
d’vn ieune Roy & vertueux des personnes de
cette nature, & que si nostre grand Prince n’estoit
preserué par vne grace speciale, il seroit à
craindre & pour luy & pour nous, que de si pernicieux
Ministres ne corrompissent son esprit ?
Quant à moy ie suis du sentiment de celuy qui a
dit, que la pieté, la iustice, & la magnanimité
sont les trois parties de l’ame d’vn Estat. Mazarin
n’a aucune de ses vertus, & si ie ne craignois
de retomber en des redites, ie pourrois tracer
icy quelque chose de sa vie infame ; mais certes