Mazarinade n° C_1_40_04
Image de la page
Anonyme [1649], SVITTE ET QVATRIEME ARRIVÉE DV COVRIER FRANÇOIS, APPORTANT TOVTES LES Nouuelles de ce qui s’est passé depuis sa troisiéme arriuée iusques à present. , françaisRéférence RIM : M0_830. Cote locale : C_1_40_04.
Quelques Troupes Ennemies de la Garnison de sainct Denys, continuans
les desordres qu’elles ont tousiours exercées, ont esté piller plusieurs
Bourgs des enuirons, & entre autres le Menil Madame Ranse, où
ils ont fait plusieurs dégasts, en haine de ce que de ce lieu Monsieur de
Broussel, Conseiller au Parlement, que les Ennemis du Roy & de l’Estat
vouloient sacrifier, pour s’estre monstré vray & fidelle seruiteur du Roy,
& Protecteur du pauure Peuple, auoit esté remmené glorieusement en
la Ville de Paris, dont il auoit esté tiré par la faction des Monopoleurs.
Ce mesme iour cinquiéme, la Cour de Parlement, toutes les Chambres
assemblées, déliberant sur la lettre que Messieurs du Parlement de
Normandie luy auoient escrite le premier de ce mois, par laquelle ils
> remercient ladite Cour, de la part qu’elle leur auoit donnée des resolutions
qu’elle auoit prises en ce dernier rencontre d’assaires, & luy donnent
asseurance qu’ils employeroient les moyens à eux possibles pour la
conserueroient tousiours auec ladite Cour la parfaite intelligence qu’elle
desire d’eux, & sur l’establissement du Semestre fait audit Parlement
depuis quelques années : Et encores sur les Arrests dudit Parlement de
Roüen, dés vingt septiéme, trentiéme Ianuier, & premier de ce mois :
Et apres auoir oüy le Sieur Miron Conseiller Deputé, auroit arresté &
ordonné, qu’il seroit fait response par escrit audit Parlement de Normandie,
& qu’il y auroit parfaite ionction & intelligence de la Cour
audit Parlement, au preiudice de laquelle ne sera rien fait qui puisse blesser
le seruice du Roy, le bien de son Estat, & les interests dudit Parlement :
Que Remonstrances seroient faites au Roy & à la Reine Regente,
sur la Creation & Establissement dudit Semestre, que la Cour par ledit
Arrest, a declaré auoir esté fait contre les Loix du Royaume, & qu’elle ne
tiendra ceux qui ont esté admis és charges dudit Semestre, que pour
personnes priuées, & suiuant l’Arrest du vingt-huictiéme Ianuier dernier,
declaté les Conseillers & Officiers des Cours Souueraines & autres,
qui feront les Establissemens des Semestres nouueaux sans Edicts
bien & deuëment verifiez en la Cour, indignes & incapables de tenir
honneurs, & d’entrer és Compagnies Souueraines : Et outre arresté
que ledit Parlement de Normandie sera conuié de donner Arrest contre
le Cardinal Mazarin, pareil à celuy donné en la Cour le huictiesme Ianuier
dernier.
Lesdits Arrests que ledit Parlement de Roüen a rendus en la presence
de Monseigneur le Duc de Longueuille, Gouuerneur de la Prouince de
Normandie, & du Sieur Marquis de Beuueron, Lieutenant General audit
Gouuernement, apportez par ledit Sieur Miron Deputé, & qui ont
esté leus en l’Assemblée de la Cour, sont au nombre de trois.
Le premier du vingt septiéme Ianuier, porte que ledit Parlement a
Image de la page