Mazarinade n° E_1_126
Image de la page
Anonyme [1649], SVITTE ET TROISIEME ARRIVÉE DV COVRIER FRANÇOIS, APPORTANT TOVTES LES Nouuelles de ce qui s’est passé depuis sa seconde arriuée iusques à present. , françaisRéférence RIM : M0_830. Cote locale : E_1_126.
contre lesquels, nonobstant le grand nombre des ennemis, ils se battirent
si vaillamment qu’il en demeura sur la place plus des leur que de ceux
de cette petite troupe, conduite par le Sieur du Seuigny, qui remmena ses
gens en seureté dans la ville auec quelques Païsans qui y apporterent
des viures.
L’on a eu nouuelles de Prouence, que le Comte d’Alets Gouuerneur
de la Prouince, voulant fauoriser l’iniuste intention du Cardinal Mazarin,
fit le vingtiesme de ce mois (iour dedié à la Feste de sainct Sebastien,
dont on fait solemnité en la ville d’Aix, le peuple assistant en vne
Procession qui s’y faisoit ledit iour) entrer dans ladite ville d’Aix quãtite
de gens de guerre pour la surprendre ; ce qu’ayant esté veu par quelques
habitans, en ayans aduerty les autres, il se trouua en vn moment
dix sept à dix huict mil hommes sous les armes, qui repousserent viuement
lesdites Troupes iusques au Chasteau, duquel en fin ils furent
contraints de sortir sans armes & sans bagage : & au regard dudit Comte
d’Alets est demeuré prisonnier.
Et que depuis on s’estoit asseuré à Marseille de la personne du Duc
de Richelieu General des Galeres, soubçonné d’intelligence auec ledit
Comte, & des vaisseaux qui estoient aux Ports de Marseille & de Toulon.
Le Samedy trentiesme, la Cour ordonna qu’il soit déliuré Passe-ports,
tant ordinaires qu’extraordinaires, signez de Messieurs Viole & le
Doux Conseillers, par elle commis pour l’ordre des postes, ou de l’vn
d’eux en l’absence de l’autre, & du Greffier Guyet, auec inionction aux
Capitaines & Officiers de la Ville de Paris de les laisser passer, sans
qu’il leur soit fait aucun empeschement ny retardement.
Et encores le mesme iour, ladite Cour fit defenses à tous Clinquailliers,
Armuriers, & autres Marchands, de vendre les Mousquets de
Charle Ville, Mezieres, & du Liege, auec les Bandoulieres, plus de
huict liures chacun : Ceux de Hollande & de Sedan auec la Bandouliere,
plus de dix liures piece : Les piques de fresne auec les fers communs,
plus de vingt-quatre sols piece : La paire d’Armes fortes auec le pot ; plus
de douze liures, les foibles plus de dix liures : La paire de pistolets à fusil
auec les foureaux dix-huict liures, & ceux à roüet seize liures : La
liure de poudre à mousquet plus de vingt sols, & la fine plus de vingt-quatre
sols : La liure de plomb quatre sols, & celle de meche quatre
sols.
Ce mesme iour les Troupes Mazarines estãs allées vers Brie-Comte
Robert à dessein de le surprendre, quelques Troupes de Cauallerie des
Regiments leuez à Paris en ayant eu aduis, y surent pour les en empescher,
& d’effet les Ennemis en estãs aduertis, tournerent le dos sans vouloir
rende aucun combat ; de sorte que l’on fit venir fort facilement plusieurs
Image de la page