[retour à un affichage normal]

Mazarinade n° D_1_36

Image de la page

Bourbon-Condé, Louis II de (prince de Condé) [signé] [1651], LETTRE DE MONSEIGNEVR LE PRINCE DE CONDÉ, Escrite à tous les Parlemens de France. , françaisRéférence RIM : M0_2009. Cote locale : D_1_36.

Altesse Royale & les nostres, ainsi nous auons eu
ce desplaisir de voir toutes choses comme abandonnées
ou du moins suspenduës iusques à ce
que le Cardinal Mazarin eust envoyé ses décisiõs
du lieu ou il s’est retirés les iustes soupçons que
nous auons conçeu de leur conduite, ont augmẽté
nostre liberté & la seureté de nostre personne
nous a semblé beaucoup plus exposée, des lors
que nous auons esté obligez de leur faire connoistre
que nous ne pouuions iamais consentir au retour
de leurs Maistre, & c’est ce qui les a obligé de
renouveller leurs soins affin de nous nuire ; en effet
peu de iours auparauant nostre retraite, nous
auons esté advertis de plusieurs endroits d’vne entreprise
sur nostre personne, qu’ils auoient résolu
de faire reussir, auparauant que nous allassions
prendre possession de nostre Gouvernement de
Guyenne, en ce mesme temps nous en informasmes
S. A. R. qui depuis nostre départ a eu la bonté
d’en rendre tesmoignage a Messieurs du Parlement
de Paris. La passion que nous auons de seruir
l’Estat, l’obligation d’assister aux Conseils du
Roy, nous auroit fait negliger les aduis qu’on nous
donnoit des mauuais desseins du Cardinal Mazarin
& de ses creatures, si l’on ne nous eust asseuré
qu’ils les vouloient executer la nuict mesme que
nous nous sommes retirez de la Cour, que pour
cét effet les soldats du Regiment des Gardes auoient
ordre de s’assembler sous leurs Drapeaux,
que l’on en auoit veu plusieurs trouppes en divers
endroits, ces circonstances si particulieres nous
obligerent de nous en informer, & en effect ceux
que nous envoyasmes pour les examiner, nous
aporterent que plus de deux cens hommes estoiẽt