[retour à un affichage normal]

Accueil > recherche > Affichage d'une occurrence en contexte

Mazarinade n° B_2_33

Image de la page

Dubosc-Montandré, Claude [?] [1652 [?]], L’ESCVEIL DE LA ROYAVTÉ OV LA POLITIQVE DV CONSEIL, OV L’ON verra dans vn raisonnement pathetique, I. Que le Conseil nous fait apprehender le retour du Roy, lors que nous le desirons auec passion; & qu’il veut le faire reuenir en Tyran, lors que nous demandons qu’il reuienne en Roy. II. Que le Conseil fait apprehender ce regne, en ce qu’il ne veut point que le Roy relasche mesme dans les choses qui sont les plus contraires à l’auantage des peuples. III. Que le Conseil fait mépriser le Roy; en ce qu’il le fait parler fiérement, lors mesme qu’il n’a pas assez de force, pour faire vouloir ce qu’il veut. IV. Que le Conseil fait agir le Roy; non pas pour establir les interests de la Royauté, mais pour establir les interests de ses Ministres. V. Que le Conseil semble degrader le Roy, en ce qu’il le fait agir en Subjet ambitieux, qui veut s’establir par complot, & par intrigue. Par le Sieur D’ORANDRÉ. , françaisRéférence RIM : M0_1183. Cote locale : B_2_33.


effets crient tous les iours vengeance deuant le
Thrône de Dieu ! Auez vous des finances pour fournir
à toutes les grandes despenses d’vn dessein, que
vous n’establirez iamais que sur les ruines & sur la desolation
de tout cét Estat : Auez vous assez de resolution
pour tenir teste à toute l’Europe qui vient en
foule à nostre secours, en intention de desemparer la
Chrestienté du plus general, & du plus meschant de
tous les ennemis.
 
Prenez garde Messieurs, que vous n’exposiez
l’authorité du Roy, lors mesme que vous faites semblant
de l’appuyer auec plus de passion : Prenez garde
qu’en pour suiuant de l’establir, vous ne la destruisiez ;
& qu’en entreprenant de la retirer d’vne decadence
pretenduë, vous ne la fassiez entierement tomber
dans le precipice.
Est-ce restablir l’authorité du Roy, que d’exposer
la conduite de sa Maiesté au mespris & à la risée
de tous ses peuples ? Est ce restablir l’authorité du
Roy, que de luy faire entreprendre inconsiderement
toute sorte de desseins, & n’en pouuoir pas executer
vn seul ? Est ce restablir l’authorité du Roy, que de
luy faire parler fierement, lors mesme qu’il est en sa
plus grande foiblesse, & de le faire aheurter opiniastrement
à ses premieres resolutions, lors mesme
qu’il est à la veille de les voir toutes auorter à sa confusion,
& à la honte de tout son Conseil.