[retour à un affichage normal]

Mazarinade n° B_9_4

Image de la page

Gondi, Jean-François Paul / cardinal de Retz [?] [1652], LE MANIFESTE DE MONSEIGNEVR LE DVC DE BEAVFORT, PAR LEQVEL IL DECLARE SE Ioindre à son Altesse Royale au Parlement & à la Ville de Paris. , françaisRéférence RIM : M0_2368. Cote locale : B_9_4.

Iustifient le Parlement, & le Peuple dans la Declaration,
que l’vn & l’autre fait de perdre le Cardinal Mazarin. Ie
ne veux pas seulement passer soubs silence, les iniustices
qui ont esté commises contre ma personnes : Les Arrests
que le Parlement à donnez en faueur de mon Innocence,
condamnent assés les violences de mes ennemis, comme
la loüange n’est pas dans la bien-sceance en la bouche de
ceux qui parlent d’eux, aussi ie ne pourrois discouurir du
blasme que mes ennemis ont encouru de tous les gens de
bien, sans affecter en quelque façon ma propre gloire.
Mais de plus, quelque estroite obligation que i’aye de
former icy de plaintes contre ceux qui ont persecuté nostre
Maison, le veux estouffer mes ressentimens pour
n’en auoir point que de communs auec les vostres. Neantmoins
comme vn debuoir ne choque point l’autres &
que ie n’agis icy que par des motifs de pieté.
 
Ie ne me puis dispenser de tesmoigner de la haine contre
les persecuteurs de Monseigneurs & Pere le Duc de
Vendosme. Et certes s’il s’est treuué vn fils auquel la pieté
rendit la parole ayant crié, bien qu’il fut muet lors qu’il
vit venir le coup qui debuoit rauir la vie à celuy qui la luy
auoit donnée quels efforts ne doibs-je point icy faire
pour condamner la Barbarie de ceux qui ont fait mourir
le mien mille fois dans les langueurs d’vne estroite & iniustice
Prison. Mais quoy comme les ames genereuses
sont incapables de crainte aussi les laches sont fort subjettes
à la peur : & comme cette passion prouient de foiblesse,
aussi le moindre subiect la cause iusques dans lexcez.