[retour à un affichage normal]

Mazarinade n° B_17_16

Image de la page

M. B. I. V. D. R. D. L. P. P. T. [1652], ARREST SVR LE IVGEMENT rendu contre l’Autheur DE LA VERITÉ TOVTE NVE, ET L’AVOCAT GENERAL parties Aduerses. , françaisRéférence RIM : Mx. Cote locale : B_17_16.

point le glaiue sans cause. C’est vn mal extreme lors que le Prince
est contrainct de tirer son glaiue contre ses sujets, autant que
quand le chef commande aux bras d’vn mesme corps, dont il est
le chef, de tailler en pieces les parties du mesme corps : Attendu
que comme l’vnion de toutes les parties sous la conduite des sens
residans au chef, se conseruent les vns & les autres : Ainsi faut-il
croire que par la diuision & discorde des parties, le Tout perir.
C’est pourquoy, comme il importe entierement à toutes & à
chacune des parties de connoistre leurs propres fonctions & de
les executer, ainsi en est-il au chef, non seulement de sçauoir,
mais de faire son deuoir, de bien gouuerner & commander.
 
Or comme le genre de gouuernement est monarchique d’vn
seul Prince souuerain, il importe tant plus qu’il en ait apris les
moyens, puis qu’il commande seul absolument sans dependance.
Autrement la volonté laquelle n’est point appuyée sur vne
vraye lumiere de l’entendement est comme vn aueugle qui ne
chemine qu’à tatons, ou par hazard, laquelle est autant prejudiciable
& hazardeuse, que la conduite d’vn aueugle par vn autre
aueugle, qui tous deux tombent dans la fosse. Mat 15. v. 14.
La seconde & principale chose comme la fin, & le but d’vn
Estat, est de conseruer les bons. La premier moyen est d’abolir le
regne des meschants : Le second est la Iustice en conseruant &
en rendant à vn chacun ce qui luy appartient de droit ou de merite :
l’vn & l’autre moyen sont fort bien declarez au 16. ch. des
Prou. v. 12. Ceux qui font mal, sont abominables au Roy. car le siege
Royal est confirmé, par Iustice. Si donc le Prince veut rendre son
throne inesbranlable, qu’il fasse Iustice : Si au contraire il permet
l’impieté & l’iniquité, son siege Royal balance à sa ruine.
Or d’autant que personne ne peut rendre Iustice, qu’il n’ait
apris ce qui est d’equité & de raison, il s’ensuit que le Roy ne
doit point ignorer les Loix & les Ordonnances de son Royaumes,
autrement, comment y pourra-il conformer ses iugements ?
C’est pourquoy, il importe au Prince qu’il en soit instruict
pour rendre ses iugements autant certains & vtiles, comme
il est souuerain Iuge, desquels on ne peut appeller qu’à
Dieu seul infallible, qui au cas d’Arrests contraires à ses loix,
il en sera luy-mesme le Iuge. Ps. 81. v. 6. Combien de temps iugerez
vous iniquité ? i’ay dit vous estes des Dieux, mais vous mourrez comme
bommes, & cherrez comme l’vn des Princes. Dieu iuge au milieu
les Dieux v. I. Qu’il faut entendre ses Anges ou les Princes