[retour à un affichage normal]

Mazarinade n° C_12_40

Image de la page

M. L. M. D. [1652], LE PERROQVET PARLANT A LA COVR, Qui descouure les faussetez, artifices & suppositions, commises par les principaux Officiers de Finance. Les moyens d’en retirer plusieurs millions d’or apres une bonne & solide Paix; & rendre le peuple comme il estoit du Reygne de Henry IV. Representé au Roy Louys XIV. par M. L. M. D. , françaisRéférence RIM : M0_2749. Cote locale : C_12_40.

tous y accourent, & chacun à l’enuye apporte vne
pierre au bastiment de ce grand edifice de la restauration
de la France en son encienne splendeur & felicité.
 
Or, Sire, outre tant de graces & vertus Royalles
qui reluisent en vous, il n’y en a point qui vous concilie
plus l’amour de tant de peuples que de vous
voir suiure les traces & les pas de ce grand Roy
vostre pere, Roy qui ne se donnoit aucun relasche,
tousiours trauaillant, tousiours recherchant les
moyens d’establir & d’affermir le repos des siens,
le vostre mesme : & sans parler des grandes guerres
qu’il a heureusement menées pour sauuer son Royaume,
ny des belles loix & ordonnances par luy faictes
depuis ceste paix qu’il nous a acquise : (Car cela passe
tout discours, pour la hautesse du subiect.) V. M.
verra icy l’ordre qu’il auoit commencé d’establir pour
la bonne conduitte & legitime administration de ses
Finances, afin d’empescher les abus & maluersations
qui s’y commettent ordinairement par les Officiers
d’icelle, au tres-grand preiudice & domage de luy &
de toute la chose publiquc de son Estat : Ordre qu’il
auoit pris à cœur, (que ie vous donneray en suitte)
comme le nerf de la guerre, mais aussi le pilotis des
affaires d’vn Estat, par le moyen duquel on vient à
bout des plus grandes choses, & les plus fortes difficultez,
sont la pluspart surmontées : aussi faute de deniers
ou par l’abus ou mauuais mesnage d’iceux, tout
va non seulement en desordre, mais en ruine & perdition.
Entre toutes les actions qui ont decoré sa vie,