[retour à un affichage normal]

Accueil > recherche > Affichage d'une occurrence en contexte

Mazarinade n° B_4_2

Image de la page

P. M. D. C. [signé] / Camaldoli, Michel de (père) [1652], LE COMETE ROYAL PRONOSTIQVANT A LA Reine vn deluge des vengeances du Ciel, en punition, I. Des Incestes. II. Des Violements. III. Des Sacrileges. IV. Des Sodomies. V. Des Brutalités. Qui se cometent dans la guerre qu’elle fomente, pour soustenir l’Ennemy de la Chrestienté. , français, latinRéférence RIM : M1_66. Cote locale : B_4_2.



MONSEIGNEVR,
Dieu a quelquefois menacé son peuple d’animer des
pierres, & de leur donner la voix pour parler. Le silence
presque perpetuel que nostre regle nous enjoint, nous
rend semblables à ces pierres, & nous ne deuons parler
que par vne inspiration pressante, & par vn commendement
exprés du Ciel. Tous mes Confreres m’ont chargé
de vous écrire, puisque vostre absence de Grosbois
nous empesche d’aller tous en corps pour implorer la
charité de V A. enuers vn peuple qui ne reconnoist de
puissance & de grãdeur que la vostre, apres celle du Roy,
& qui a toujours esperé sa protection de vostre bonté
naturelle.
Les desordres de la guerre ciuile que vous auez veuë
en France, & où vous auez tant acquis de gloire, n’ont
esté en rien comparables aux mal heurs que nous auõs
veus, que nous voyons tous les iours, & que Dieu n’a
pas voulu que vous ayez pû veoir, parce que l’horreur
de la plus detestable rage, & du plus grãd embrasement,
dont nous ayons des exemples, eut rendu V. A. immobile,
comme la femme de Loth, & par consequent incapable
de soulager vn pauure pays que vous auez adopté
pour patrie, & où vous auez esleu vostre sepulture.
Les ruines d’vne petit prouince mise à sac, mise en cẽdres,
vous conuient & vous obligent par le rang que
vous tenez dans l’Estat, ou plustost par le rang que vous
allez perdre bien tost par vne mort naturelle, & par celuy