Mazarinade n° A_9_9
Image de la page
Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
On a creu que sa Majesté
N’estoit pas trop en seureté,
Et que bien que cela déroge
De faire ainsi Iacques desloge,
Retraitte faite comme il faut
Valloit bien vn meschant assaut.
Le Ieudy la Cour toute entiere
Resoudoit sur cette matiere :
Mais comme elle estoit au parquet
Il luy vint vn autre pacquet,
Dont elle ne fit point lecture,
Non pas seulement l’ouuerture,
Et dont Messieurs les Gens du Roy
Furent creus sous leur bonne foy,
Disans, que par icelle lettre
On vouloit le Parlement mettre
Et transferer à Montargis :
Mais Messieurs, qui de leur logis
N’auoient point acheué le terme,
Dirent qu’il falloit tenir ferme,
Et qu’on iroit le Roy prier
De vouloir les noms enuoyer
De ceux dont la correspondance
Estoit dommageable à la France,
Afin que l’ombre d’vn gibet
Punist l’ombre de leur forfait.
Et lors les Gens du Roy partirent,
Et selon qu’il fut dit, ils firent :
Mais ils reuindrent non oüis
De sainct Germain peu réjoüis.
7. Ianv.
Le Vendredy premier iour maigre,
Messieurs sur le traittement aigre
Qu’on auoit fait aux Gens du Roy,
Ordonnerent suiuant la Loy
Que la Reine auroit Remonstrance
Sur le plus fin papier de France.
Et parce que le Cardinal
Leur sembloit l’autheur de ce mal,
Qui depuis par son ministere
Leur a bien preuué le contraire :
Ils iugerent mal à propos
Qu’il troubloit le commun repos,
Qu’il emplissoit sa tirelire,
Qu’il hayssoit nostre bon Sire :
Luy manderent que dans ce iour
Il se retirast de la Cour,
Et dans huict de France il fist gille ;
Sinon, en joinct à bourg, à ville
De luy courir sus comme au loup
A qui chacun donne son coup,
Taloche, ou panne, grainguenaude,
Et de luy ietter de l’eau chaude,
Indulgence à qui l’occiroit.
Cependant que l’on armeroit
Pour la seureté des entrées,
Et pour l’escorte des denrées.
Ce mesme iour vinrent icy
Messieurs les Bouchers de Poissy.
Disant que par vne Ordonnance
Le Roy leur a donné vacance,
Et defendu de trafiquer
Tant qu’il cessast de nous bloquer.
8. Ianv.
Le Samedy neuf fut choisie
De la plus leste Bourgeoisie,
Que l’on pensoit faire sortir,
Mais elle n’y pût consentir :
Neantmoins c’estoit la plus leste,
Iugez-donc par elle du reste,
Et dés ce iour l’on connût bien
Que la meilleure ne vaut rien.
Or ce iour de quelque village
Il vint du pain & du fromage ;
Mais que nous causa de tourmens
Et plus qu’aux plus parfaits amans
L’esloignement d’vne Maistresse,
L’abscence des pains de Gonesse ?
Que quinze cens Colintanpons
Asseurerent estre fort bons,
Comme des Gardes quelque bande
La pinte de sainct Denis grande,
Gardes qui parurent tres-fiers
Aux pauures choux d’Aubervilliers.
9. Ianv.
Ce mesme iour fut restablie
La taxe du temps de Corbie,
Auec ordre à chaque habitant
De payer vne fois autant,
Que pour iouyr des benefices
Attachez aux premiers Offices,
Les Conseillers mal-agréez,
En six cens trente-cinq créez,
Payeront trois cens mille liures,
Dont ils feront charger les liures.
Ce iour il n’entra pas vn bœuf,
Mais les vaillans Princes d’Elbeuf,
Et notamment le Duc leur pere,
Fut touché de nostre misere,
Image de la page